DILI, 05 setembru 2022 (TATOLI)—Banku Nasionál Komérsiu Timor-Leste (BNCTL, sigla portugés) konsege fó ona kréditu ba kliente 20.000 resin iha territóriu laran, ne’ebé depozita ona osan hamutuk millaun $182.
Diretór Ezekutivu BNCTL, Brígido de Sousa, hateten, daudaun iha ona kliente hamutuk 400.000 resin.
“Daudaun ne’e BNCTL nia totál depózitu iha millaun $500 resin, ho kréditu ba kliente 20.000 resin ho osan besik millaun $182, ne’ebé ho nia taxa juru entre 3% to’o 10% ba empréstimu sira,” Diretór Ezekutivu informa ba Agência Tatoli, foin lalais ne’e, iha ninia knaar fatin, Mandarin.
Notísia relevante: PN aprova adisionál millaun $50 ba MTKI expande implementasaun kreditu suave
Tinan kotuk Governu halo transferénsia hamutuk millaun $1,3 ba kréditu suave iha banku BNCTL hodi apoiu ba empréstimu sira.
“Maizumenus empreza 20 sai benefisiariu ba kréditu suave ne’ebé ho momntante $600.000 hodi halo kréditu entre $25.000 ho nia nia funan 3% ba empreza pequena,” nia akresenta.
Tinan ne’e ho aprovasaun orsamentu ratifikativu millaun $50, tuir programa atu aloka tan ba kréditu suave, maibé sei halo diskusaun no prepara akordu hodi implementa.
Jornalista : Arminda Fonseca
Editora : Julia Chatarina
