iklan

NASIONÁL, DEFEZA, HEADLINE

Kadete foun na’in-600 admitidu ba vaga F-FDTL 2022

Kadete foun na’in-600 admitidu ba vaga F-FDTL 2022

Formatura membru F-FDTL, iha Aeroportu Internasionál Nicolau Lobato Dili, segunda (05/09). Imajen Tatoli/Francisco Sony

DILI, 05 setembru 2022 (TATOLI)— Komisaun Rekrutamentu Konjunta, kompostu hosi  Komandu FALINTIL-Forsa Armada Timor-Leste (F-FDTL) no Ministériu Defeza (MD), segunda ne’e, ofisialmente anúnsia lista naran membru foun na’in-600 mak admitidu iha vaga F-FDTL tinan 2022.

Liuhosi konferénsia imprensa ne’ebé hala’o iha Kuartél Jenerál F-FDTL, Fatuhada-Dili, Segundu Koordenadór  ba Komisaun Rekrutamentu Konjunta kadete F-FDTL foun 2022, Tenente Koronél Mario Baptista ‘Bersama’ hateten liuhusi prosesu teste médiku,psikotest, entrevista no teste fíziku ba aplikante na’in-1.422, ikus mai kadete na’in-600 mak selesionadu no prenxe rekezitu hodi inkorpora iha loron 19 fulan-setembru  ne’e iha  sentru instrusaun Komandante Nicolau Lobato-Metinaro.

“Lista finál  komisaun hato’o ona ba iha Ministru Defeza no mós ba iha ita nian Xefe Estadu Maior Jenerál F-FDTL,  Tenente Jeneral Falur Rate Laek, no  dokumentu ne’e hetan ona aprovasaun final, nune’e hahú aban komisaun rekrutamentu dezloka ba iha munisípiu 13 inklui Rejiaun Aadministrativu Espesiál Oé-cusse no Ambeno (RAEOA)  atu taka sai naran  kadete  na’in-600 ne’ebé maka pasa iha prosesu teste ne’ebé hala’o iha Metinaro,” katak Tenente Koronél Bersama.

Hosi kadete foun ne’ebé maka liu teste hamutuk 600, kompostu hosi feto na’in 65, ekivale ho 10,5% no mane 535 ekivale ho 89,5%.

Koordenadór ne’e dehan, rekrutamentu ba kadete foun tinan ne’e la haree ba iha rejime espesiál, maibé haree ka foku liu pur méritu tanba hakarak fó oportunidade ba sidadaun hotu atu kompete hodi bele serbí povu no nasaun liuhosi vida militár.

Komisaun mós husu atu kadete sira ne’ebé selesionadu atu aprezentaan iha data ne’ebé determina 19 setembru no baihira la aprezenta-aan mak konsideradu tama lista elimina.

Tuir data ne’ebé determina iha loron 19 setembru kadetessira aprezenta aan iha Kuartél Jenerál Fatuhada hodi halo konfirmasaun no loron 20 setembru sei trasnporta ba Sentru Metinaro hodi hala’o treinamentu.

Alende ne’e, Komisaun Rekrutamentu ne’e mós husu ba kadete foun sira katak bainhira aprezenta aan tenke lori mós ho konta bankária, kartaun eleitorál no foto kolóridu ho medida 3×4 tahan rua.

Kada kadete tenke lori roupa zinástiku, sapatu no mea mutin pár rua inklui  Kalsa metan no kamizola mutin no kada kandidatu autoriza lori de’it ropa sívil hanesan kalsa naruk no kamizola gola par rua no lori lamina ka silet pakote ida, lori eskova no grasa sapatu kór metan, lori relojiu liman ida. Enkuantu Kandidatu tenke mai aprezenta aan tenke tesi fuuk mane sentimu ida no ba feto sentimu 10 .

Jornalista: Natalino Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!