iklan

HEADLINE, MUNISÍPIU, OÉ-CUSSE (RAEOA), POLÍTIKA

Kampaña ikus ba konsulta populár, milísia oho joven rua iha sede CNRT Oé-Cusse

Kampaña ikus ba konsulta populár, milísia oho joven rua iha sede CNRT Oé-Cusse

Símbolu rua (CNRT ho Autonomia) iha bulletin de votu bainhira povu ba vota iha loron konsulta popular iha 30 agostu 1999. Imajen/dok. Espesiál

OÉ-CUSSE, 05 setembru 2022 (TATOLI) – Iha loron 28 agostu 1999 povu Oé-Cusse realiza enseramentu ba kampaña aberta ba loron referendu 30 agostu 1999 iha kampu futeból Oébau, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).

Hafoin kampaña iha kalan ne’e, milísia pro-autonómista sira halo asalta ba sede CNRT ne’ebé lokaliza iha aldeia Oésono, suku Costa, hodi rezulta joven na’in-rua hakotu vida mak hanesan, saudozu Henrique da Costa Oqui ‘Moris Diak’ milísia sira mak baku mate no saudozu Atilio Cofan ahi mak han iha sede laran to’o hakotu vida.

Tan ne’e, Koordenadór Konsellu Juventude hosi sub-rejiaun Oésilo ne’ebé hamahon aan iha Konsellu Nasional Juventude Timor-Leste (CNJTL), Marcos Caunan, rekomenda ba Ministériu Kombatente Libertasaun Nasionál (MAKLN) atu harii monumentu ba saúdozu na’in-rua ne’e tanba iha kampaña ikus iha sede CNRT Oé-Cusse iha 28 agostu 1999.

“Ami husu Ministeriu Asuntu Kombatente no Libertasaun Nasionál liuhosi Konsellu Veteranu iha RAEOA atu harii monumentu ida ba joventude loriku asuwain na’in-rua (2), saudozu Henrique da Costa Oqui no saudozu Atilio Cofan ne’ebé mate iha kampaña ikus iha sede CNRT Oé-Cusse iha 28 agostu 1999, atu nune’e kada tinan povu Oé-Cusse selebra loron joventude 12 Novembru, ita bele kari ai-funan iha monumentu ne’e tanba ha’u haree tinan-rua ona ita sempre ba kari ai-funan iha semitériu jerál de’it,” Marcos Caunan ko’alia iha Oé-Cusse.

Responde ba rekomendasaun ne’e, Konsellu Veteranu RAEOA, Martinho da Cunha, informa parte Konsellu Veteranu iha ona planu atu harii monumentu iha kada sub-rejiaun sira, no daudaun ne’e sei halo hela identifikasaun ba fatin.

“Atu harii monumentu ne’e, ita iha ona planu hosi nasionál sei tau iha kada sub-rejiaun sira, ema-ne’ebé mate sira-nia naran tau hotu iha-ne’eba, nune’e kada tinan selebra loron boot sira komunidade bele ba sunu lilin no kari ai-funan, maibé daudaun ne’e parte konsellu sei identifika fatin no kontinua hein orsamentu, planu iha ona,”. Nia afirma.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!