iklan

EDUKASAUN, HEADLINE

Profesór 3.252 sei transmite koñesimentu lian portugés ba estudante

Profesór 3.252 sei transmite koñesimentu lian portugés ba estudante

Prezidente INFORDEPE, Manuel Gomes de Araújo. Imajen Tatoli/Francisco Sony

DILI, 05 setembru 2022 (TATOLI)–Ministériu Edukasaun Juventude no Desportu (MEJD) liuhosi Instituto Nacional de Formação de Docentes e Profissionais da Educação de Timor-Leste (INFORDEPE) garante katak profesór 3.252 ne’ebé frekuenta hela formasaun lian portugés iha nível B2, bainhira ramata sei transmite fali koñesimentu ba estudante iha nível ensinu hotu.

Prezidente INFORDEPE, Manuel Gomes de Araújo, relata, profesór sira daudaun tuir hela formasaun nível A2, hafoin ramata sira sei tama fali ba nível B1 ne’ebé sei realiza iha loron 12 setembru tinan ne’e no bainhira ramata ona sei taka ho formasaun nível B2.

“Ita-nia profesór sira sei sai esperansa ba Ministériu Edukasaun Juventude no Desportu atu kontinua hanorin lian portugés iha eskola sira hodi bele transmite sira-nia koñesimentu di’ak liután iha lian portugés ba estudante sira iha nível ensinu hotu,” Prezidente INFORDEPE, informa iha nia knaar fatin, Balide, segunda ne’e.

Notísia relevante: Timor-oan 53 prontu fó formasaun lian portugés ba profesór 4.300

Profesór 3.252 ne’ebé tuir hela formasaun portugés nível A2, balun termina ona no balun seidauk termina.

Tuir planu MEJD, formasaun ba profesór timor-oan tinan ne’e tenke atinje 4.300, maibé INFORDEPE hasoru difikuldade kona-ba akordu formasaun ne’ebé ministériu halo ona ho Instituto de CAMOES.

“Loloos tuir akordu entre parte rua presiza formadór 33 hosi Portugal atu mai fó formasaun ba profesór timor-oan sira iha tinan ne’e, maibé sira bele apoiu de’it ema na’in-lima tanba difisil atu hetan profesór ho totál númeru bazeia ba akordu,” nia akresenta.

Formadór na’in-lima hosi Portugal ne’e hetan mós apoiu hosi timor-oan na’in-53 inklui mestradu timor-oan na’in-11 iha área lian portugés ne’ebé durante ne’e hala’o hela formasaun ba profesór 3.252 no tuir akordu ne’ebé hala’o ona hatudu katak formadór portugés 33 hosi Portugal mai duni no sira sei destaka iha kada munisípiu hodi fó formasaun ba profesór timor-oan sira.

“Tanba númeru la sufisiente, entaun iha kada munisípiu destaka de’it mestradu timor-oan ida ho formadór portugés ida, balun formadór portugés de’it no balun fali formadór timor-oan de’it,” nia haktuir.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!