DILI, 05 setembru 2022 (TATOLI)— Diretora Servisu Saúde Munisípiu Dili, Agostinha Segurado, informa ekipa saúde hahú halo preparasaun asaun atu prevene kazu dengue, bainhira udan-monu rai.
“Ita nia ekipa sira hahú halo ona preparasaun atu prevene kazu dengue, bainhira udan monu rai tanba ita halo ona koordenasaun ho Autoridade lokál sira atu prepara no halo asaun iha ida-diak área liuhosi hamoos lixu,” Diretora ne’e hateten ba Jornalista sira iha kna’ar fatin-Dili, segunda ne’e.
Daudaun ne’e, Servisu Saúde Munisípiu Dili hahú halo sensibiliza informasaun liuhosi koloka ekipa inspetór saúde na’in-28 iha suku sira munisípiu Dili.
“Ami sei distribui ai-moruk abate no fumigasaun ba área risku sira iha munisípiu Dili,” nia kompromete.
Durante ne’e, Servisu Saúde Munisípiu Dili servisu hamutuk ho Cruz-Vermelha Timor-Leste (CVTL) atu kontinua halo asaun prevensaun ba dengue iha área risku sira.
Tuir dadus Servisu Saúde Munisípiu Dili hahú 2021 to’o 2022, rejista kazu dengue hamutuk 3.820-resin no mate 49.
Alende ne’e, Diretora ne’e mós informa hahú prepara atu sosializa rutina ba prevensaun moras hada’e no la hada’et sira iha kapitál Dili.
“Munisípiu Dili hahú preparasaun sosializasaun ba atividade rutina hanesan vasina sarampu, rubéola inklui ba prevensuan dengue nian no mós ba moras sira seluk ne’ebé mak mosu bainhira udan monu rai-nian,” nia afirma.
Munisípiu Dili iha hetan númeru postu vasina boot tanba populasaun barak, nune’e konsege harii postu vasina hamutuk 300, ne’ebé sei harii iha postu fasilidade saúde hotu inklui fasilidade privadu Hospitál Nasionál Guido Valadares (HNGV) no mós klínika militár nian.
“Ita iha postu vasina hamutuk 300 ba aldeia 222 iha Dili atubele kobre ba labarik idade 0 to’o menus tinan-lima iha eskola pre-primaria ne’ebé hamutuk 56 no eskola internasionál mak tama ona lista,” katak.
Jornalista : Felicidade Ximenes
Editór : Florencio Miranda Ximenes
