iklan

NASIONÁL, HEADLINE, KAPITÁL

Bus Palapa baku-fila iha Laleia, pasajeiru na’in-rua kanek kamaan

Bus Palapa baku-fila iha Laleia, pasajeiru na’in-rua kanek kamaan

Bus Palapa baku-fila iha postu administrativu Laleia, tersa (06/09/2022). Imajen/espesiál

DILI, 06 setembru 2022 (TATOLI)–Bus Palapa ho númeru matríkula 37.885, tersa ne’e, tuku 10:50 dadeer, hetan dezastre (baku-fila) iha postu administrativu Laleia, munisípiu Manatuto.

Komandante Polísia Tránzitu Manatuto, Inspetór Ernesto da Silva Ximenes, informa, bus ho marka Palapa ne’e halo movimentu ho dirasaun Baucau bá Dili, maibé to’o iha postu administrativu Laleia mak hetan asidente.

“Pasajeiru hamutuk na’in-18 inklui ho kondutór, ne’ebé hosi sira ne’e, na’in-rua mak kanek kamaan no seluk laiha buat ida. Sira na’in-rua halo ona tratamentu saúde iha postu saúde Laleia, enkuantu sira seluk kontinua viajen mai Dili ho transporte seluk,” Inspetór Ernesto da Silva, informa ba Agência Tatoli, via telefónika, tersa ne’e.

Notísia relevante: Bus Mabenifa baku fila iha Manatuto, kauza husi kondutór matan dukur

Nia haktuir, bus ne’e para iha subida atu tula tan pasajeiru iha Laleia maka kondutór sama travaun laiha, entaun hakiduk mak baku fila.

“Bus ne’e daudaun iha hela fatin akontesimentu, maibé ha’u rona fali informasaun hosi adjuntu Eskudra Laleia katak patraun bus ne’e nian mai ona iha Laleia atu buka ekipamentu pezadu hodi dada sai lori mai iha Eskuadra Manatuto hodi submete ba investigasaun,” nia akresenta.

Nune’e, tanba karreta baku-fila la’ós iha rai tetuk, ne’ebé sai ladi’ak entaun presiza ekipamentu pezadu mak dada sai.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!