DILI, 06 setembru 2022 (TATOLI)-Dom Virgílio Kardeál do Carmo da Silva, SDB, iha tuku 15: 48 lokraik ne’e to’o ona iha fatin Uma Adat, João Paulo II, Tasi-Tolu, hodi partisipa iha misa solene.
Virgílio Kardeál to’o iha Tasi-Tolu ne’ebé simu hosi grupu kulturál dansa tebe-tebe. Kardeál dahuluk Timor-Leste ne’e la’o hodi fó bensaun ba sarani sira-ne’ebé partisipa iha misa ho Maromak nia grasa, no iha sekuénsia tuirmai sei hahú ho misa.
Igreja hamutuk ho Governu liuhosi Ministériu Administrasaun Estatál (MAE) organiza misa solene ne’e hanesan misa agradesimentu ba Kardeál foun hafoin Dom Virgílio Kardeál simu pose serimónia konsistóriu ordináriu públiku (investidura) hamutuk ho Bispu na’in-20 iha 27 agostu 2022 iha Basilika Santu Pedro Vátikanu-Roma.
Tuir observasaun jornalista Agência TATOLI iha terrenu nota katak, situasaun atuál dadaun iha Tasi-Tolu marka mós prezensa hosi líder hosi órgaun soberania haat maibé Prezidente Repúblika (PR) José Ramos Horta, auzénsia tanba hala’o hela viajen Estadu ba Austrália marka de’it nia reprezentante, membru Oitavu Governu konstituisionál, membru Parlamentu Nasionál, padre, madre, família hosi Eminénsia, korpu diplomátiku, no konvidadu sira seluk, no sarani lubun ua’in.
Ksolok boot ba povu no sarani Timor-Leste, dahuluk iha istória Timor-Leste Amu Papa Francisco hili Bispu timoroan ida sai Kardeál, sarani rihun ba rihun hosi diozese tolu hanesan Dili, Baucau no Maliana ne’ebé marka prezensa iha eventu misa ne’e sente kontente no ksolok tebes.
Tuir oráriu santa misa hahú iha tuku 16:00 to’o 18:00 otl no hafoin misa ramata sei iha diskursu hosi Primeiru Ministru (PM), Taur Matan Ruak, Prezidente Konferénsia Episkopál Timor-Leste (CET, siglá portugés), Bispu Dom Norberto Amaral.
Nune’e mós sei iha sesaun hasai retratu ka fotográfia hamutuk ho Dom Virgílio Kardeal do Carmo da Silva, SDB ho direjente igreja nian no konvidadu sira, depois ne’e sei iha jantár konfraternizasaun, ba ajenda ikus mak taka ho konsertu múzika espirituál.
Entretantu, misa ne’e hetan seguransa másimu hosi eskuteiru igreja, grupu THS-THM no ho membru Polísia Nasionál Timor-Leste (PNTL).
Jornalista : Nelson de Sousa
Editór : Evaristo Soares Martins
