DIILI, 06 setembru 2022 (TATOLI)—Komandu FALINTIL-Forsa Defeza Timor-Leste (F-FDTL), hahú loke investigasaun ba kazu ema sivíl baku no tuda kanek membru F-FDTL ida hosi Komponente Navál, Primeiru Sarjentu Joanico Baptista.
Kazu baku no tuda membru membru F-FDTL ida hosi Kompinente Navál , Primeiru Sarjentu Joanico Baptista, ne’e akontese iha área Bidau-Akadiruhun iha Segunda (05/9), tuku 17:00, bainhira membru ne’e tenta atu hakalma situsaun ba tuda malu ne’ebé akotese iha área ne’ebá, maibé la konsege tanba konfrontu ne’e envolve joven barak, nune’e nia rasik hetan tuku no tuda to’o hetan kanek iha parte ulun.
“Membru F-FDTL ne’e tenta atu hakalma situsaun ne’e, maibé tanba ema ema barak, entaun nia mós hetan baku no tuda. Tanba ne’e, Komandu F-FDTL sei loke prosesu investigsaun ba kazu refere,” Portavós Komandu FALINTIL- Forsa Defeza Timor-Leste (F-FDTL), Kapitaun José da Costa Nunes, hateten lihosi konferénsia imprensa iha Kuartél Jenerál-Fatuhada-Dili, tersa ne’e.
Hatán kona-ba membru F-FDTL informasaun espalla iha públiku, antes ne’e membru F-FDTL ne’e hatais sivil, maibé bainhira rona konfrontu mak tama ba uma hatais farda militár hodi ba hakalma situasaun, Portavóz ne’e dehan nia parte labele fundamenta buat balun tanba prosesu hotu sei iha faze investigasaun.
“Ha’u labele ko’alia buat ida tanba rezultadu investigasaun mak sei justifika buat sira ne’e,” katak nia.
Daudaun ne’e, membru F-FDTL halo hela tratamentu saúde iha Ospitál Nasionál Guido Valadares (HNGV, sigla portugés) no kondisaun di’ak hela no kontinua serbisu hanesan baibain.
Liga ba situaasaun ne’e, Komandu F-FDTL mós husu ba membru F-FDTL hosi Komponente hotu no Unidade Polisia Militár atu kontrola nian membru sira.
“Husu ba membru F-FDTL iha territóriu tomak no atu hakmatek no halo serbisu tuir orden no orientasaun Komandu nian,” nia afirma.
Komandu F-FDTL mós desmente informasaun ne’ebé haktuir katak Komandante Komponente Navál Kapitál Mar e Guerra Higinio das Neves lidera membru hosi komponete navál halo detensaun ba suspeitu ne’ebé baku kanek membru F-FDTL ne’e.
“Polisia no militár ne’e seguransa nasaun nian atu halo kontrolu iha territóriu Timor-Lete iha oras 24 ne’ebé iha obrigasaun ba situsaun saida de’it liuliu garante estabilidade nasionál,” katak nian.
La tolera ema tula-liman ba membru F-FDTL
Iha biban ne’e, Kapitaun José da Costa Nunes, akresenta Komandu F-FDTL mós la tolera ema sivíl tula-liman ka baku membru F-FDTL.
“La tolera ema sivíl tula-liman ba forsa, uluk ami sempre ko’alia bebeik ba sivíl sira ita nian populasaun sira hakarak ka lakohi tenke respeita ó nia forsa ó nia polisia. Tanba úniku ó nia forsa no ó nia polisia mak asegura no garante hakmatek inklui apoiu populasaun hotu, nune’e husu ba sidadaun sira atu kontribui hamutuk hodi kria pás no estabilidade,” katak portavós ne’e.
Nune’e, Komandu F-FDTL apela ba joven sira ne’ebé envolve iha Grupu Arte Marsiál no Arte Rituál sira atu kontribui ba pás no estabilidade.
“Sé de’it mak la kontribui ba pás no estabilidade ne’e nia tenke toma responsabilidade perante lei no justisa,” katak
Lider arte marsiál tenke kontrola nia-membru
Entretantu, portavós Komandu F-FDTL mós husu ba lideransa membru Arte Marsiál sira hotu atu kontrola sira nia membru, nune’e kontribui ba estabilidade nasionál.
“Apela ba maun boot sira liuliu lideransa Arte Marsiál sira atu kontrola membru sira ho didi’ak atu prevene halo krime iha ita nian-rai laran,” nia apela.
Lideransa GAM sira tenke kontrola membru sira iha territóriu laran tomak atu uza atributu sira iha fatin propriu no karik ba fatin públiku tenke mantein disipliña hodi labele labele disturbu estabilidade nasionál.
“Husu ba públiku labele pániku ho situasaun ida ne’e tanba Timor-Leste iha nian polísia no forsa atu garante nafatin estabilidade no buat hotu ne’ebé maka akontese,” nia afirma.
Jornalista : Natalino Costa
Editór : Florencio Miranda Ximenes
