DILI, 06 setembru 2022 (TATOLI)—Negosiante, Serfina do Santos, ne’ebé halo atividade negósiu ho karosa, hetan rendimentu di’ak durante misa agradesimentu no resesaun Dom Virgílio Kardeál do Carmo da Silva, iha Tasi-tolu, kuarta ne’e.
“Iha ita-nia misa agradesimentu ohin ne’e, ami hetan rendimentu di’ak hanesan $70 to’o $80, tanba loron-loron ami hetan rendimentu baibain $40. Dezde preparasaun ba ita-nia misa ne’e ema la mai hola, aliende ne’e iha lor-loron mós ami hein ema la mai hola ida,” Negosiante informa ba Agência Tatoli.
Notísia relevante: Padre Guilhermino konsidera nomeasaun Dom Virgílio Kardeál hanesan onra ba povu
Tanba ne’e, nia parte sente haksolok ho serimónia misa agradesimentu no resesaun kardeál dahuluk tanba ema hola sasan barak liu.
“Ohin ha’u sente kontente ema mai hola barak, tanba ami-nia moris mak ho fa’an ne’e. Tanba ami tuur iha uma sente ladi’ak, entaun ami book-an fa’an sasán hodi sustenta moris,” nia akresenta.
Negosiante, Juvita Soares, sente triste tanba iha serimónia boot ne’e ema ladún hola sasán kompara ho loron-loron.
“Ohin ha’u hetan rendimentu $40, maibé seidauk misa ne’e ami fa’an iha leten loron ida hetan $50, tanba ne’e ha’u sente triste, tanba ema barak mai misa maibé ladun hola,” nia tenik.
Tuir observasaun jornalista Agência Tatoli iha terreni nota katak negosiante ne’ebé durante ne’e halo atividade negósiu iha Tasi-tolu, Autoridade Munisípiu Dili (AMD) muda hotu ba tasi-ibun atu nune’e bele halo atividade ho di’ak.
Jornalista : Nelia Fernandes
Editora : Julia Chatarina
