DILI, 06 setembru 2022 (TATOLI)-Primeiru-Ministru (PM), Taur Matan Ruak, husu deskulpa ba públiku relasiona grupu joven balun perturba orden públiku iha sidade Dili no impede sidadaun sira-nia hakmatek.
“Ha’u sente triste, lamenta no arrepende haree violénsia foin liubá iha kapitál Dili. Nu’udar Primeiru-Ministru, ha’u husu deskulpa tanba perturba inan-aman, komunidade no sidadaun sira-nia hakmatek. Mai ita deklara violénsia hanesan inimigu ita-nian, no promete kombate hasoru violénsia to’o halakon iha ita rain doben Timor-Leste”, Primeiru-Ministru hato’o deskulpa ne’e liuhosi nota ne’ebé Agência Tatoli asesa hosi Gabinete Xefe Governu, tersa ne’e.
Xefe Governu hanesan mós Ministru Interior alerta ona ba komandu Polísia Nasionál Timor-Leste atu vijilánsia másima hodi mantein orden públiku iha Kapitál Dili.
Eis Prezidente Repúblika ne’e apela mós ba joven sira atu hakmatek hodi kontribui ba estabilidade nasionál, husik problema krime ne’ebé akontese ona, entrega ba justisa.
Jornalista : Antónia Gusmão
Editór: Evaristo Soares Martins
