Sobrevivente Masakre Setembru Negro husu joven buka hatene istória pasada TL
COVALIMA, 06 setembru 2022 (TATOLI)–Sobrevivente Masakre Setembru Negro Suai 1999, Elizeu Gusmão ‘Sabelae’, husu ba joven sira atu buka hatene istória pasada oinsá atu harii nasaun Timor-Leste, nune’e hosi jerasaun ba jerasaun tenke hatutan ba malu.
Notísia Relevante: Masakre Setembru Negro nia hun mai hosi 26 fevereiru 1999
“Ami husu joven sira presiza atu hatane istória pasada liu-liu istória oinsá atu harii nasaun ida ne’e. Ohin loron, ita goza no la’o livre, joven presiza badinas buka informasaun, nune’e hodi hatutan nafatin istória ne’ebé moruk iha tinan 23 nia laran, nune’e kontinua hatutan ba malu,” Elizeu Gusmão Sabelai hato’o bainhira realiza atividade kalan reflesaun, iha resintu igreja Ave Maria Suai, segunda ne’e.
Sobrevivente ne’e aproveita oportunidade bainhira autoridade kompetente mós partisipa hotu iha atividade kalan reflesaun hodi komemora masakre setembru Negro 1999 ba dala-XXIII tanba joven barak la hatene istória.
“Ami haree autoridade parte kompetente iha ne’e hotu, agora ita-nia jerasaun foun barak la hatene istória, tanba ita seidauk iha kurríkulu atu hatene istória,” nia dehan.
Tanba ne’e, presiza tau atensaun ba istória nune’e jerasaun foun sira bele estuda maske istória balun hakerek ona iha livru, iha buat balun ne’ebé la kompletu bele husu direta autór sira-ne’ebé mak sei moris maibé lee ona sira-nia istória.
Notísia Relevante: Setembru Negro, mate-isin butuk iha igreja oin hanesan foho oan ida
Jornalista : Celestina Teles
Editór : Cancio Ximenes
