iklan

NASIONÁL, KAPITÁL

AMD sei kontrata karreta tanke haat rega ai-horis iha estrada protokolu

AMD sei kontrata karreta tanke haat rega ai-horis iha estrada protokolu

Trabailladór Kompaña Rilero Unipessoal L,da, halo konstrusaun foun jardin 2006, iha Caicoli Dili, kuarta (24/08). Imajen Tatoli/Francisco Sony

DILI, 07 setembru 2022 (TATOLI)—Adjuntu Prezidente Autoridade Munisípiu Dili (AMD), António Moniz Clau, informa Governu liuhosi Autoridade Munisípiu Dili (AMD) sei kontrata kompañia atu fornese karreta tanke haat (4) hodi rega ai-horis iha jardin estrada protokolu.

“Daudaun ne’e, orientasaun hosi Ministru Administrasaun Estatál atu ita halo urjentemente kontratu ba kompañia sira-ne’ebé durante apoiu rega jardin sira atu apoiu tan ita, entaun iha tempu badak ita sei halo kontratu ba kompañia sira atu fornese tan tanke haat atu rega ita-nia jardin sira iha tempu bai-loron,” António Moniz Clau hateten ba Agência Tatoli iha nia kna’ar fatin, Dili, kuarta ne’e.

Autoridade Munisípiu Dili daudaun ne’e iha tanke rua, maibé la sufisiente atu rega ai-horis sira iha jardin estrada protokolu.

“Ami iha tanke rua, nia atu sustenta rega de’it ai-oan sira hosi areportu internasionál mai to’o Rotunda Nicolau Lobato, tanba bainhira hetan fali hand over ida ba jardin hosi Delta Nova nia oin no hosi hodi laran mai to’o Ponte 03, entaun tanke rua ne’ebé iha labele atu fornese bee másimu. Ho ida-ne’e sira tenke fahe loron atu oinsá rega jardin hosi Hudi Laran mai to’o ponte Comoro 03, hosi Elemloi mai to’o Delta Nova no Palásiu Prezidente nia oin mai to’o Saudozo Nicolau Lobato, hosi ne’e ita-nia tanke atu rega mak la to’o,” nia dehan.

Maske nune’e, nia esplika, ai-horis iha jardin estrada protokolu, Autoridade Munisípiu Dili, loloos rega loro-loron maibé depois hand over jardin hosi Delta Nova nia oin to’o Elemloi, hosi Hudi Laran mai to’o Ponte 03 fó de’it mak jardin maibé Autoridade Munisípiu Dili la hatene nia kontinuidade atu halo jestaun ba rega ne’e tanba la entrega.

“Entaun, ami araska no ami tenke halo jestaun ba ami-nia karreta tanke rua ne’ebé iha, atu nafatin halo atividade rega ai-horis. Maibé, ita tenke redús ona tanba uluk ita foku hosi Saudozu Nicolau Lobatu to’o Palásiu Prezidente Repúblika nia oin, agora ita tenke husik loron rua tenke ba ne’ebá. Hosi ne’e afeta mós tanba iha loron boot 30 agostu ita la servisu, entaun ai-oan sira ita haree namlaek hotu,” nia dehan.

Maske nune’e, Autoridade Munisípiu Dili (AMD) esforsu tomak ho apoiu Ministru Administrasaun Estatál nia orientasaun atu iha tempu badak kontrata tan tanke haat (4) atu apoia Munisipiu Dili hodi rega jardin sira.

“Entaun, ita-nia kontratu ne’e ho durasaun fulan tolu, hahú setembru to’o novembru tanba iha dezembru ne’e udan ona,” nia esplika.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!