Apoiante Lere fiar delegadu sei aprezenta proposta revizaun ba estatutu FRETILIN

DILI, 07 setembru 2022 (TATOLI)—Portavós Ekipa Susesu ba Pakote Jenerál Reformadu Lere Anan Timur ho Rui Maria de Araújo, Jacinto Maria Soares, hateten apoiante fiar katak iha kongresu dalimak partidu FRETILIN ne’ebé sei realiza iha 08 setembru ne’e, delegadu sira sei aprezenta proposta ba revizaun estatutu partidu FRETILIN nian.
Nia hateten, kualkér kongresu ne’ebé realiza automatikamente tenke iha revizaun ba estatutu no liga ho Jenerál Lere Anan Timur defende Fretilin iha luta nia laran ene ema hotu la dúvida tanba iha istória hatudu iha tinan 1981 eleitu nu’udar menbru Komite Sentrál Fretilin (CCF) ne’ebé to’o ohin loron laiha kongresu ruma atu hasai nia hosi Fretilin, tanba ne’e prenxe kriteiru hotu atu avansa ba kandidatura Prezidente partidu Fretilin 2022-2027.
“Apoiante sira iha konfiansa boot katak Jenerál Lere prenxe duni kriteiru no ami fiar delegadu sira sei haree estatutu partidu FRETILIN, sei halo revizaun atu jenerál Lere tenke avansa ba kandidatura Prezidente partidu Fretilin 2022-2027 ho ninia misaun ne’ebé rai hela lori atu hadi’a Fretilin ba future,” Portavós, Jacinto Maria Soares, deklara liuhosi konferénsia imprensa ba jornalista sira iha, rezidénsia ponte Myfriend, Deambata-Bessi-Lahane Orientál, kuarta ne’e.
Mezmu nune’e, nia hateten kona-ba forsa polítika delegadu ne’ebé sei partisipa kongresu mai ida ne’e buat hotu-hotu desizaun hosi delegadu sira-nian hodi bele lori buat foun ba iha Fretilin no Lere hanesan modelu lideransa ida-nia iha objetivu ne’ebé luan atu halo Fretilin buras liután iha Timor-Leste.
‘’Kandidatu Lere nakloke tiha ona iha públiku hotu akompaña, konserteza ami iha konfiansa hotu-hotu tau konsentrasaun ita lakohi mosu tan pakote ida kontra pakote mamuk kada kongresu Fretilin nian tanba Fretilin mak inan no aman demokrásia, nune’e presiza kompete entre pakote ho pakote,” nia dehan.
Nune’e vota tuir militante nia aspirasaun hodi garante vitória Fretilin iha eleisaun sira tuir mai inklui eleisaun parlamentár iha tinan 2023.
Enkuantu, tuir ajenda durante loron tolu hahú iha loron 08-10 setembru ne’e, partidu Fretilin sei realiza kongresu nasionál dalima hodi hili lideransa foun partidu nian no kongresu ne’e sei partisipa hosi delegadu hosi territóriu iha direitu votu hamutuk 930 no suplente 67.
Notísia Relevante: Kandidata-an ba líder FRETILIN presiza kompleta mandatu tinan-ida sai membru CCF
Jornalista : Nelson de Sousa
Editór : Cancio Ximenes

