VIQUEQUE, 07 setembru 2022 (TATOLI)–Ekipa hosi Diresaun Nasionál Sidadania iha Ministériu Justisa (MJ), kuarta ne’e, hala’o sosializasaun kona-ba lei rai ba komunidade iha suku Builale, postu administrativu Ossu, munisípiu Viqueque.
“Objetivu sosializasaun maka atu partilla informasaun liuliu lei rai nian, ne’ebé Prezidente Repúblika promulga ona iha tinan 2017. Ita hatene lei ne’e hanesan rejime espesiál definisaun títulu bens no móvel no seluk tan,” Diretór Diresaun Sidadania iha MJ, Flaviano Moniz, hateten iha sede suku Builale.
Notísia relevante: 28 novembru, Governu ofisializa atribuisaun sertifikadu rai ba komunidade
Aleinde ne’e, Diresaun Terra no Propriedade munisípiu Viqueque mak sei halo levantamentu rai.
“Ami-nia kna’ar maka fahe lei sira hanesan lei númeru 8, 13 no lei númeru 9 kona-ba nasionál nian,” nia akresenta.
Tinan ne’e MJ sei distribui sertifikadu na’in ba rai, ba komunidade sira maibé sei hahú hosi Oé-cusse.
“Ministru Justisa sei distribui sertifikadu ba ita-nia komunidade, maibé sei distribui uluk ba komunidade sira iha Oé-cusse,” nia tenik.
Jornalista : Vitorino Lopes da Costa
Editora : Julia Chatarina
