DILI, 17 agostu 2022 (TATOLI)— Governu liuhosi Ministériu Justisa, planu atu ofisializa atribuisaun sertifikadu na’in ba rai ba komunidade sira iha territóriu nasionál iha loron 28 novembru 2022.
Atribuisaun sertifikadu na’in ba rai ne’e ho baze ba lei númeru 13/2017 kona-bá Definisaun Bens no movél ne’ebé Prezidente Repúblika promulga ona. Iha lei ne’e sidadaun ka ema atu hetan direitu ba rai tenke prenxe kritériu kona-ba direitu primária no mós iha direitu sekundária.
Direitu direitu primaria katak, bainhira ema ka sidadaun Timór ne’ebé mak iha ona sertifikadu iha tempu Portugés no iha tempu Indonézia mai to’o tempu ukun aan ne’e autómatikamente hetan sertifikadu nain ba rai.
Maibé, tuir lei ne’e mós kuandu tempu Portugés no Indonézia mak ema halo arrendamentu ka aluga de’it tenke fó fila ba Estadu atu jere.
Ho nune’e, Ministru Justisa (MJ), Tiago Amaral Sarmento, hateten Governu sei ofisializasaun atribuisaun sertifikadu na’in ba rai hahú hosi Rejiaun Administrativu Espesiál Oé-cusse no Ambeno (RAEO), ne’ebé partisipa direta hosi Primeiru Ministru Taur Matan Ruak.
“Prezidente Repúblika promulga tiha ona dekretu-lei kona-ba informasaun kadastrál, atravez dekretu ida ne’e, sei fó kbi’it ba Ministériu Justisa hahú halo atribuisaun sertifikadu nain ba rai ba sidadaun Timor-Leste laran tomak,” katak Governante ne’e ba jornalista sira, hafoin remata enkontru Konsellu Ministru iha Palasiu Governu, kuarta ne’e.
Iha ámbitu reuniaun Konsellu Ministru ne’e, Ministru Tiago halo reafirmasaun ba dekretu-lei informasaun kadastrál no Konsellu Ministru deside loron 1 novembru tinan ne’e, lei refere tama ein vigór.
Nune’e, Ministériu Justisa liuhosi Diresaun Terras no Propriadade hahú trasa planu no preparativu sira hodi koordena ho Ministériu Administrasaun (MAE) no Ministru Asuntu Kombatente Libertasaun Nasionál hodi halo atribuisaun sertifikadu nain ba rai.
“Ami sei atribui uluk ba ema ne’ebé hela iha Uma Kbi’it La’ek (UKL) no uma ba Veteranu sira, tanba ne’e Diresaun Terras no Propriadade no Servisu Kastrál sebisu hamutuk ho Ministériu relevante atu hahú halo levantamentu ba benefisiáriu hirak ne’e. Enkuantu ba komunidade sira seluk sei atribui iha tinan oin,” tenik Ministru Justisa.
Notísia relevante: MJ sei emite sertifikadu ba rai hahú hosi REAOA
Jornalista: Natalino Costa
Editór : Florencio Miranda Ximenes
