DILI, 07 setembru 2022 (TATOLI)—Governu liuhosi reuniaun Konsellu Ministru (KM), kuarta ne’e, aprova projetu dekretu-lei ne’ebé aprezenta hosi Ministru Finansa, Rui Augusto Gomes, ba aprovasaun regulamentu veíkulu Estadu no alterasaun dahuluk ba dekretu-lei númeru 21/2021, loron 10 novembru, ne’ebé kria ona subsídiu mensál transporte.
“Projetu dekretu-lei ne’e ho objetivu atu estabelese norma kona-ba akizisaun, rejistu afetasaun, jestaun, uza, atribuisaun, manutensaun, reparasaun, monitorizasaun, fiskalizasaun, abatimentu, inklui alienasaun veíkulu Estadu,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu.
Notísia relevante: Governu kria subsídiu mensál transporte ba funsionáriu administrasaun públika
Portavóz Governu dehan, alterasaun ne’e ho hanoin atu halo ajustamentu balun ba dekretu-lei númeru 21/2021, loron 10 novembru, liuliu atu define pagamentu subsídiu mensál ba transporte, nune’e bainhira suspende karik atribui fins pesoál ba benefisiáriu veíkulu Estadu, hosi data produsaun efeitu atribuisaun nian to’o data remata.
Projetu dekretu-lei ne’e sei revoga dekretu-lei númeru 8/2003 loron 18 juñu, kona-ba regulamentu atribuisaun no uza veíkulu Estadu.
Antes ne’e, MF liuhosi Diresaun Jerál Jestaun Patrimóniu Estadu rejista veíkulu Estadu hamutuk unidade 3.415, ne’ebé unidade 2.820 (83%) destaka iha nasionál no unidade 595 (17%) destaka iha munisípiu.
Veíkulu Estadu a’at hamutuk unidade 402 no di’ak unidade 3.013, ne’ebé hosi totál ne’e, karreta Estadu tama tinan leilaun hamutuk unidade 2.522 no karreta Estadu di’ak tama iha leilaun unidade 893.
Aleinde ne’e, Diresaun Jerál Jestaun Patrimóniu Estadu prevee ona osan millaun $1,6 ba subsídiu transporte kada tinan, kompostu hosi diretór jerál tinan ida $232.000, diretór nasionál $417.000, xefe departamentu $507.000 no xefe seksaun $167.000, ne’ebé montante hirak ne’e la sura ho funsionáriu públiku baibain ne’ebé atribui kada fulan $25.
Jornalista : Antónia Gusmão
Editora : Julia Chatarina
