Governu diskute polítika-lejizlativa kriasaun INSP-TL
DILI, 07 setembru 2022 (TATOLI)–Vise-Ministru Saúde, Bonifácio Mau Coli dos Reis, aprezenta opsaun polítiku-lejizlativa iha reuniaun Konsellu Ministru (KM), kuarta ne’e, ne’ebé sai hanesan baze ba inisiativa kriasaun Institutu Nasionál Saúde Públika Timor-Leste (INSP-TL).
“Kriasaun INSP-TL atu tau hamutuk iha institutu úniku ida ba atribuisaun sira hanesan monitorizasaun, avaliasaun no análize estadu jerál saúde, kolaborasaun iha vijilánsia epidemiolójika no sanitária, investigasaun sientífika no kontrolu risku no ameasa sira ba saúde públika, dezenvolvimentu no formasaun rekursu umanu sira, peskiza no inkorporasaun teknolójika iha saúde públika, nune’e mós kontrolu ba kualidade ne’ebé determina iha área sira saúde nian,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun Ezekutivu iha Palásiu Governu, kuarta ne’e.
Notísia relevante: Kazu Moras Dengue Sai Ameasa Ba Saúde Públika
Iha ámbitu atribuisaun sine’e, iha kooperasaun ka rede ho institutu konjenere ho país sira seluk, hakarak kria organizasaun ida ho baze sientífika ne’ebé forte hodi disponibiliza lideransa no esperiénsia ba esforsu sira ne’ebé halo ona iha nível nasionál hodi alkansa substánsia di’ak sira no ba prazu naruk saúde públika, no afirma oinsá fonte fiavel ida akonsellamentu ba formulasaun polítika no toma desizaun hosi responsável polítiku sira.
“Ne’e foin halo diskusaun ba polítika-lejizlativa nian, tanba ne’e maka Ministériu Saúde sei lori hikas dokumentu ne’e mai hodi diskute molok halo aprovasaun,” nia akresenta.
Jornalista : Antónia Gusmão
Editora : Julia Chatarina
