DILI, 07 setembru 2022 (TATOLI)–Governu liuhosi reuniaun Konsellu Ministru (KM), kuarta ne’e, delibera ona hodi aprova naran sira ne’ebé atu propoin ba Prezidente Repúblika (PR) ba kargu embaixadór estraordináriu no plenipotensiáriu Repúblika Demokrátika Timor-Leste iha Reinu Unidu.
Projetu deliberasaun ne’e aprezenta hosi Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno.
“Kona-ba naran detalla ema ne’e nian tempu oin mai mak foin fó sai hafoin hetan aseitasaun hosi Prezidente Repúblika tanba MNEK hato’o mai Konsellu Ministru hodi hetan aprovasaun no sei haruka ba Prezdente Repúblika mak sei deside,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: Filomeno Aleixo nomeadu nu’udar Embaixadór extraordinária no Plenipotensiáriu Timor-Leste ba ASEAN
Aleinde ne’e, KM halo desizaun ida atu fó dupla akreditasaun ba Embaixadór Timor-Leste iha Reinu Béljika atubele kobre mós ba Fransa, Alemaña, Luxemburgu, Polónia, no Repúblika Xeka.
“Tanba ita laiha embaixadór ne’ebé maka rezidente iha país hirak ne’e, entaun ita-nia embaixadór ne’ebé hela iha Reinu Béljika sei tau-matan ba nasaun sira ne’e,” nia akresenta.
Jornalista : Antónia Gusmão
Editora : Julia Chatarina
