iklan

COVALIMA, POLÍTIKA

MAE fó formasaun utiliza sistema dijitalizasaun ba PAAS Covalima

MAE fó formasaun utiliza sistema dijitalizasaun ba PAAS Covalima

MAE fó formasaun ba PAAS iha Covalima. Imajen Tatoli/Celestina Teles.

COVALIMA, 07 setembru 2022 (TATOLI)–Ministériu Administrasaun Estatal (MAE) liuhosi Dirasaun Nasionál Apoiu Administrasaun (DNAAS) fó formasaun utiliza sistema dijitalizasaun ba Pesoál Apoiu Administrasaun Suku (PAAS) iha munisípiu Covalima.

“Formasaun ba loron ohin ne’e sei hala’o durante loron tolu, oinsa aumenta ita-boot sira-nia kuñesimentu kona-ba utilizasaun sistema dijitalizasaun ne’ebé ita bolu sistema integradu informasaun jestaun dadus suku no aldeia. Durante ne’e, ami haree ita-boot sira atualiza dadus ho manual,” Diretór DNAAS, Doddy António Maria Madalena Maia, hato’o liuhosi nia diskursu, iha salaun administrasaun Covalima, Sukaer Laran, kuarta ne’e.

Formasaun ida-ne’e importante ba pesoál ne’ebé apoiu suku sira, tanba durante uza sistema manuál hakarak transforma uza ba sistema dijitalizasaun tanba PAAS balun foun no balun foin mak rekruta.

Maibé PAAS balun ne’ebé mak rekruta iha tinan 2010, sira iha ona kuñesimentu tanba halo ona formasaun, aleinde hosi MAE fó formasuan Organizasaun Noun Governametál mós hala’o ona formasaun.

“Formasaun ba PAAS sira-ne’e sai hanesan bukae ba ita-boot sira. Ha’u la fiar ita-boot sira servisu de’it sai PAAS tenke aproveita kualker atividade formasaun, hosi ne’ebé de’it ita-boot sira tenke apreende no aproveita didi’ak,” nia dehan.

Tanba sistema sira-ne’e uniformiza hotu kuaze iha 452 suku hanesan hotu, karik balun seidauk iha kuñesimentu hafoin finaliza formasaun mak seidauk iha kuñesimentu tenke buka hatene suku sira-ne’ebé mak iha ona kuñesimentu kona-ba Sistema refere.

“Sistema ne’e ita uza iha katégoria off line no online maibé agora daudaun ita uza sistema off line. Ita uza online bainhira ita iha ona infraestrutura ne’ebé sufisiénte ona. Nune’e, ami labele ba ona suku, munisípiu no ba iha nasionál maibé xefe suku sira manda dadus liuhosi komputadór ka internet de’it,” nia esplika.

Reprezentante Administradór Munisípiu Covalima, Francisco de Jesus Alves, husu ba Pesoál Apoiu Administrasaun Suku (PAAS) tenke aproveita oportunidade tuir formasaun ne’etenke foku, nune’e bele apreende buat ruma.

“Ita-boot sira tenke aproveita bainhira loke vaga ba administradór munisípiu. Imi bele aplika vaga tanba iha ona esperiénsia prepara an tenke tuir formasaun ho foku,” nia hateten.

Nia husu ba PAAS sira iha Covalima, tuir formasaun tenke foku no labele tama-sai maibé se PAAS sira la foku tuir formasaun, formadór tenke hato’o informasaun ba autoridade munisipál atu nune’e bele fó xamada tanba nia laiha vontade atu tuir formasaun.

Tanba, tuir nia, iha nasaun avansadu bainhira tuir formasaun tenke selu maibé agora PAAS suku tuir formasaun graituita, nune’e agora tenke tuir formasaun tanba aban bainrua kompetisaun makaas liu no sei la uza manuál.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!