iklan

NASIONÁL, HEADLINE, KAPITÁL

MOP garante molok novembru finaliza estrada liga rotunda Comoro ba Tasi-tolu

MOP garante molok novembru finaliza estrada liga rotunda Comoro ba Tasi-tolu

Traballadór sira hosi empreza responsável projetu halo reabilitasaun estrada Tasi-tolu no Polísia tránzitu organiza transporte rodoviáriu sira ne’ebé liu iha área reabilitasaun, kuarta (27/04). Imajen Tatoli/António Daciparu

DILI, 07 setembru 2022 (TATOLI)–Ministru Obra Públika (MOP), Abel Pires, garante katak molok tama fulan-novembru estrada liga rotunda Comoro ba Tasi-tolu sei finaliza, iha ámbitu inaugurasaun Portu Baía Tibar.

“Portu Tibar iha fulan-setembru mak ramata, maibé inaugurasaun iha novembru tinan ne’e, ne’ebé sei iha tempu atu finaliza projetu reabilitasaun liga rotunda Nicolau Lobato ba Tibar. Loos duni katak neneik oituan tanba bee-dalan besi sira tenki homan ho liman maibé kuandu tama ona iha estrada ne’e fasil tanba mákina mak servisu, ne’ebé to’o fulan-novembru ne’e ha’u fiar katak sei bele finaliza,” Ministru Abel Pires hateten ba Agência Tatoli iha Palásiu Governu, kuarta ne’e.

Notísia relevante: MOP sei loke konkursu hadi’a estrada ligasaun Tasi-tolu to’o rotunda Comoro

Aleinde ne’e, Ministru konfirma kona-ba estrada hirak ne’ebé hahú a’at fali ona daudaun halo manutensaun rutina tanba la’ós estragu estruturál, maibé tanba udan-been mak halo a’at kama’an.

“Bele rezolve lalais tanba kiik-oan hela, la’ós hanesan estrada liga Tibar ba Nasuta ne’e estragu maka’as, maibé hosi Tasi-tolu ba Tibar estragu boot laiha,” nia akresenta.

Maski nune’e, tuir governnate ne’e presiza kompleta estrada liga Raikotu ba Tasi-tolu.

“Ha’u fiar katak molok tama novembru bele ramata, ida seluk hosi Raikotu ba rotunda ne’e ho  kondisaun di’ak maibé oituan tan atu loke ona konkursu hodi halo kompletu,” nia tenik.

Estrada Tasi-tolu to’o Rotunda Comoro ne’e ho naruk kilómetru rua hamutuk ho pakote estrada trosu Tibar to’o Tasi-tolu, ne’ebé antes ne’e toma-konta hosi empreza internasionál China Wuyi, ho kustu projetu millaun $12 resin, ho durasaun serbisu hahú iha loron 28 fevereiru 2017 to’o outubru 2019, maibé empreza nasionál kontinua fali halo manutensaun oha parte balun.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!