DILI, 07 setembru 2022 (TATOLI)–Ministru Transporte no Komunikasaun (MTK), José Agustinho da Silva, kompromete katak ba-oin ró-ahi Berlin-Ramelau sei la hasoru ona difikuldade ba orsamentu kombustível.
“Hanoin ba-oin laiha problema, durante ne’e ami halo ezersísiu interna, orsamentu ne’e iha de’it $3.000, ne’e labele asegura to’o fulan-dezembru, entaun iha défise $7.500 ida-ne’e maka hato’o ona ba Ministériu Finansa no ha’u rona informasaun hosi Autoridade Portuáriu Timor-Leste (APORTIL) katak pedidu ne’e iha ona konsiderasaun hosi Ministériu Finansa,” Ministru hateten iha Palásiu Governu, kuarta ne’e.
Notísia relevante: PM bolu MTK justifika insidente ró-ahi Berlin-Ramelau
Foin lalais movimentasaun ró-ahi Berlin-Ramelau hasoru difikuldade tanba kestaun orsamentu, tanba orsamentu ne’ebé prevee ba APORTIL la sufisiente ba operasionál ba ró-ahi.
“Orsamentu ne’ebé mak asegura operasionál ró-ahi tantu Berlin-Ramelau no Berlin-Nakroma la sufisiente ne’e relata hosi Konsellu administrasaun anteriór, entaun atu asegura konetividade máritima liuliu oinsá maka halo operasaun to’o fulan-dezembru, entaun Ministériu Transporte no Komunikasaun liuhosi APORTIL hato’o ona pedidu ba Ministériu Finansa oinsá bele konsidera hodi atribui orsamentu asegura konetividade ida-ne’e,” nia akresenta.
Maibé hetan resposta pozitiva hosi Ministériu Finansa hodi solusiona ona difikuldade ne’e, ne’ebé daudaun ró-ahi Berlin-Ramelau halo hikas ona operasaun rute Dili-Oé-cusse bá-mai.
Jornalista : Antónia Gusmão
Editora : Julia Chatarina
