iklan

NASIONÁL, EKONOMIA, POLÍTIKA

PM-ANAPMA aprezenta relatóriu avaliasaun implementasaun faze daruak PED 2011-2030

PM-ANAPMA aprezenta relatóriu avaliasaun implementasaun faze daruak PED 2011-2030

Kapa livru PED 2011-2030. Imajen/Espesiál

DILI, 07 setembru 2022 (TATOLI)–Primeiru-Ministru (PM), Taur Matan Ruak no ekipa hosi Ajénsia Nasionál Planeamentu, Monitorizasaun no Avaliasaun (ANAPMA) aprezenta relatóriu avaliasaun iha Konsellu Ministru (KM), kona-ba implementasaun faze daruak Planu Estratéjiku Dezenvolvimentu (PED) tinan 2011-2030.

“Relatóriu ne’e avalia objetivu PED ne’ebé alkansa ona durante períodu tinan 2017 to’o 2020. Baze ba avaliasaun maka relatóriu kona-ba implementasaun PED ne’ebé kunklui ona iha tinan 2017, ne’ebé abranje períodu tinan 2011-2016,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun KM iha Palásiu Governu, kuarta ne’e.

Aleinde ne’e, relatóriu ne’e kompila ona tuir kestionáriu sira ne’ebé prienxe liuhosi ajénsia Organizasaun Nasaun Unida (ONU) ne’ebé fó apoiu ba Governu Timor-Leste iha atividade reforma, nune’e mós relatóriu governamentál no relatóriu  sira ne’ebé prodús ona hosi Institutu Nasionál Estatístika.

Notísia relevante: Governu halo reajustamentu PED 2011-2030 hodi re-define metas

Iha tinan 2020 nia rohan, hosi totál meta hamutuk 200 hosi faze 1 (tinan 2015) no faze 2 (tinan 2020), meta 53 (26%) mak implementa ona no meta 46 (23%) besik remata ona, meta 89 (45%) rejista ona progresu balun iha implementasaun, meta 8 (4%) seidauk hahú,  no meta 4  (2%) la iha dadus disponível atu hatene ninia implementasaun.

Enkuantu, iha aumentu ne’ebé moderadu iha númeru meta sira ne’ebé finaliza ona (hosi 40 ba 53) no meta sira maka besik remata (hosi 27 ba 46) durante períodu tinan 2017-2020.

Ba nível kapitál sosiál, iha tinan 2020 nia rohan, hosi totál meta hamutuk 60 hosi faze 1 (tinan 2015) no hosi faze 2 (tinan 2020), meta 17 (28%) totalmente implementa ona no meta 14 (23%) besik hotu ona, meta 26 (44%) maka rejista progresu balun iha implementasaun, meta 3 (5%) seidauk hahú.

Iha tinan 2017-2020, meta 2 maka finaliza ona, 4 alkansa ona progresu boot ida no meta ida rejista ona progresu balun.

Iha setór infraestrutura sira, iha tinan 2020 nia rohan, hosi totál meta hamutuk 45 hosi faze 1 (tinan 2015) no faze 2 nian iha (tinan 2020), meta 12 (27%) totalmente implementa ona no meta 7 (15%) besik remata ona, meta 21 (47%) rejista progresu balun iha implementasaun, meta 3 (7%) seidauk hahú, no meta 2 (4%) la iha dadus disponível atu hatene ninia implementasaun.

Nune’e, iha períodu tinan 2017-2020, meta hitu maka remata ona, meta tolu alkansa ona progresu boot ida, no meta ida rejista  progresu balun.

Refere iha ba dezenvolvimentu ekonómiku, iha tinan 2020 nia rohan, hosi totál meta hamutuk 52 hosi faze 1 (tinan 2015) no faze 2 (tinan 2020) meta 16 (31%) totalmente implementa ona no meta 11 (21%) besik remata ona, meta 22 (24%) rejista progresu balun iha implementasaun, meta 1 (2%) seidauk hahú, no ba meta 2 (4%) laiha dadus disponível atu hatene ninia implementasaun. Iha períodu tinan 2017-2020, finaliza ona meta 3 no meta 6 alkansa ona progresu boot ida no meta 1 rejista  ona progresu balun.

Iha setór enkuadramentu institusionál, iha tinan 2020 ikus ne’e, hosi totál meta hamutuk 43 hosi faze ida nian (tinan 2015) no faze rua  hosi (tinan 2020), meta ualu ka (19%) totalmente implementa ona no meta 14 (33%) besik hotu ona, meta 20 (46%) iha progresu balun iha implementasaun, meta 1 (2%) seidauk hahú. Iha períodu tinan 2017-2020 atinje ona meta ida, meta 6 alkansa ona progresu boot ida no meta ida rejista ona progresu balun.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!