BAUCAU, 07 setembru 2022 (TATOLI) – Servisu munisipál protesaun sivíl no jestasaun dezastre naturál (SMPSJN) Baucau hamutuk ho parseiru dezenvolvementu fahe informasaun kona-bá prevensaun dezastre naturál ba komunidade iha suku lima.
Diretór SMPSJN Baucau, Nelson Abílio Soares Nunes, esplika, hosi fahe informasaun refere hanesan konseitu bázika jestaun dezastre iha baze nune’e komunidade estabelese mós komisaun risku dezastre ka konsellu protesaun sivíl iha suku lima kompostu suku Samalari, postu Baguia, postu Laga iha suku Soba, postu Quelicai iha suku Letemumu no Baucau vila iha suku Triloka no Bucoli.
“Ho kapasitasaun ne’ebé ita hala’o iha komunidade sira, espera katak bele fahe tutan ba família nune’e bele iha prevensaun ruma molok dezastre nune’e minimiza risku bainhira akontese tempu udan no anin,” Diretór Protesaun Sivil no Jestaun Dezastre Baucau informa ba Tatoli iha Vila Nova, kuarta ne’e.
Matéria importante hanesan koñesementu bázika kona-ba akontesimentu dezastre naturál iha pasadu, halo planu no prepara planu prevensaun iha futuru, mapeamentu fatin risku dezastre no fatin evakuasaun hanesan preparasaun bainhira mosu dezastre naturál.
Alende ne’e, fahé mos informasaun ba autoridade lókal hanesan xefe aldeia sira iha postu Laga no Baucau vila kona-bá koñesimentu bázika risku dezastre naturál, liuliu jestaun kona-bá evakuasaun no fatin ne’ebé seguru.
“Pelumenus bele aumenta sira-nia koñesimentu kona-bá prevensaun dezastre naturál,” Nelson Nunes akresenta.
Jornalista : Natalino Belo
Editór : Evaristo Soares Martins
