Tenente Jenerál Falur husu ba públiku respeita Militár no Polísia
DILI, 07 setembru 2022 (TATOLI)–Xefe Estadu Maiór Jenerál FALINTIL- Forsa Defeza Timor-Leste (F-FDTL), Tenente Jenerál Falur Rate Laek, husu ba públiku atu respeita militár no polisia, bainhira uza uniforme labele tula-liman tanba reprezenta ona soberania Timor-Leste nia.
“Husu bo’ot ba sivíl sira ka sidadaun liuliu joven sira tenke respeita ba oan sira iha Militár no Polísia, bainhira sira hatais farda tanba sira reprezenta soberania nasaun nian, afirmasaun soberania nasaun nian,” Tenente Jenerál Falur Rate Laek, hateten ba jornalista iha Kuartél Jerál PNTL Caicoli, kuarta ne’e.
Notísia relevante: Governu aprova regra operasionál konjunta F-FDTL no PNTL kontrola sidade Dili
Komandante F-FDTL ne’e hato’o kestaun relasiona joven balun baku no tuda kanek membru F-FDTL ida hosi Komponente Navál iha área Akadiruhun, segunda (05/09).
“Imi juventude sira loron ruma balun sei sai fali polísia no militár, tanba ne’e tenke respeita forsa ho polísia la’ós ba ka’er fatuk tuda fali ema ne’ebé hatais farda nasaun ninian ne’e. Sidadaun sira hotu tenke respeita ema ne’ebé maka uza uniforme, tanba uniforme la’ós kualkér farda ida atu ema atu tuda,” nia lamenta.
Komandu F-FDTL sei foti medida rigorozu hasoru sidadaun ne’ebé tula-liman ka baku no tuda kanek membru F-FDTL sira ne’ebé uza farda nasaun nian.
“Ohin sira husu tiha ona hau koalia barak tiha ona, ba tuda tan ha’u nia membru mka maka ita haree,” Tenente Jerál Falur Rate Laek informa.
Tenente Jenerál ne’e dehan nia-lideransa Grupu Arte Marsiál (GAM) hosi Persaudaraan Setia Hati Terate (PSHT), Pedro Aparicio husu ona deskulpa ba iha aktu ne’ebé nia-membru halo hodi rezulta membru F-FDTL kanek.
“Ha’u deit lídera membru 3.000, ha’u susar atu kontrola sa tan ida lidera ema barak ne’e atu kontrola halo nusa, Maibé husu ba sira atu respeita militár,” nia hatutan.
Iha fatin hanesan, Sekretáriu Jerál Organizasaun Arte Marsiál PSHT, Pedro Aparício, husu deskulpa ba Komandu F-FDTL tanba ho asaun membru iha loron 5 setembru 2022 konsege hakanek membru F-FDTL.
“Ha’u husu deskulpa ba iha Komandu F-FDTL tanba iha membru PSHT balun konsege baku membru F-FDT,” nia afirma.
Notísia relevante: Estrutura IKSP-TL deside suspende provizóriu atividade treinu iha territóriu nasionál
Jornalista: Natalino Costa
Editór : Florencio Miranda Ximenes
