iklan

DILI, HEADLINE, POLÍTIKA

Assanami husu FRETILIN hamoris baze frientista

Assanami husu FRETILIN hamoris baze frientista

Prezidente PD, Mariano Assanami Sabino. Imajen/Egas Cristovão

DILI, 08 setembru 2022 (TATOLI)—Prezidente Partidu Demokrátiku, Mariano Assanami Sabino, husu partidu Frente Revolucionária de Timor-Leste Independente (FRETILIN) atu kontinua hamoris baze frientista.

Notísia Relevante: Lú Olo: kongresu FRETILIN dalimak hametin prinsípiu lori naroman ba povu

“Kongresu ida-ne’e ita-nia esperansa mak frientista la haree ba partidu maibé kaer timoroan hotu, Timor ha’u-nia rai atu labele husik timoroan iha kotuk. Partidu manán ka la manán, nia iha partidu laran ka laiha maibé timoroan Fretilin hotu nia liberdade existénsia, dignididade, konsolida an prinsípsu nakonu iha Fretilin, demokrásia, Repúblika proklama hosi Fretilin tanba ne’e Fretilin labele kolen iha diferensia ideia,” Assanami hato’o iha nia intervensaun iha kongresu nasionál dalimak partidu Fretilin nian ba loron dahuluk, iha Sentru Konvensaun Dili (CCD), kinta ne’e.

Prezidente PD ne’e sente orgullu bele fó tempu nia bele ko’alia foin dahuluk iha kongresu partidu Frente Revolucionária de Timor-Leste Independente (FRETILIN) dalimak ne’e.

Nia hateten, inan-aman sira-ne’ebé akompaña hosi uma iha esperansa boot ba kongresu ida-ne’e, nune’e kongresista halo reflesaun no saida mak kontinua, tanba Fretilin halo ona buat barak iha luta libertasaun ho faze liberta povu ne’ebé durante halo ona no kontinua halo nafatin.

“Ohin, ita iha faze libertasaun povu nafatin iha partidu nia instrumentu ida-ne’e maibé povu tenke di’ak no luta Fretilin tenke kontinua nafatin,” nia dehan.

Tanba demokrásia ko’alia iha elementu hotu kona-ba ekonomia, sosiál, kulturál, polítika maibé dalaruma demokrásia ko’alia polítika kaer ukun maibé ida oinsá deliver ba moris di’ak ba povu ne’ebé Fretilin halo beibeik ne’e luta nafatin Fretilin nian.

Nune’e, nia afirma, família boot PD bainhira servi Estadu kaer ukun ka kaer PD  nafatin iha kotuk kontribui nafatin ideia no hakarak saida mak ba povu hakarak ne’e PD la kole atu fó, liu-liu partidu boot Fretilin no CNRT iha responsabilidade nasaun ida-ne’e tenke di’ak ita hakarak moris di’ak.

“Ami PD baibain dehan PD ‘maubere oan sempre prontu servi’ ne’ebé iha Fretilin nia sorin, tanba ne’e maske laiha ukun sura nafatin PD,” nia hateten.

Nune’e, delegadu sira iha kongresu ne’e kongresista hotu sai esperansa iha ema sira li’ur konsertasaun ideia rezultadu no sé mak kaer estratutura Fretilin iha oin, ukun ho valór Fretilin iha oin.

Iha fatin hanesan, Konsilleiru Másimu Partidu Kmanek Haburas Unidade Nasionál Timoroan (KHUNTO), José dos Santos Naimori Bukar, sente onra boot bele ko’alia iha kongresu ne’e.

Nia sempre iha esperansa lidér Fretilin hanesan inan no aman ba nasaun nian hamutuk ho sé de’it hodi lori nasaun ne’e ba oin, nune’e agradese partidu Fretilin lori VIII Governu Konstitusionál ba oin no hanoin ida de’it oinsá lori nasaun ba oin.

“Forsa ida-ne’e agora ita iha oinsá luta ida kaer kuda talin ba oan sira iha futuru, liu-liu ba jerasaun foun ho líder ida forte hanesan Lú Olo no Mari Alkatiri, líder forte lori nasaun ba oin mezmu hasoru situasaun sira-ne’e koko hasoru ho hamansa,” nia hateten.

Nune’e, nia-parte hanesan jerasaun foun agradese ba líder istóriku no funda nasaun konta ho sira-nia luta ba oan sira bele hamriik hamutuk ho sira, respeita nafatin sira tanba sira mak ita-nia inan-iman.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!