iklan

EDUKASAUN, HEADLINE, MUNISÍPIU, OÉ-CUSSE (RAEOA)

Estudante na’in-3.198 iha Oé-Cusse sei partisipa ezame nasionál

Estudante na’in-3.198 iha Oé-Cusse sei partisipa ezame nasionál

Diretór Edukasaun RAEOA, Daniel Mauno. Imajen Tatoli/Abilio Elo Nini.

OÉ-CUSSE, 08 setembru 2022 (TATOLI) – Diretór Servisu Edukasaun iha Rejiaun Administrativa Espesiál Oé-Cusse Ambeno (RAEOA), Daniel Mauno, relata, dadus provizóriu ba estudante hosi ensinu báziku, ensinu sekundáriu jerál no tékniku vokasionál hamutuk na’in-3.198 sei partisipa iha ezame nasionál iha outubru tinan ne’e.

“Ha’u atu informa, totál dadus estudante finalista iha Oé-Cusse hamutuk 3.198 mak sei partisipa iha ezame nasionál tinan ne’e, dadus ne’e sei provizóriu, karik to’o outubru dadus ne’e laiha mudansa entaun ita agradese, tanba ami simu ona dadus sira-ne’e mai hosi kada eskola idak-idak,” Daniel Mauno, hatete iha Oé-Cusse, kinta ne’e.

Preparasaun ezame nasionál tinan 2022 ne’e, hanesan bainbain kada tinan halo preparasaun liu-liu kandidatu sira, kada eskola hatama ona sira-nia númeru kandidatu dezde inísiu jullu to’o agostu, agora la’o nafatin ho númeru sira-ne’ebé iha ona.

“Ita konvida dirijente eskola sira hotu, mai partisipa iha enkontru ida-ne’e, no kada eskola aprezenta ona sira-nia númeru kandidatu ba ezame nasionál tinan ne’e, karik iha mudansa ruma, hosi MEJD sei informa mai rejionál, maibé to’o neste mumentu dadus ne’ebé fornese ba nasionál laiha mudansa,” nia afirma.

Bazea kaléndariu ba realizasaun ezame nasionál tinan 2022 ne’e sei realiza iha loron 24 outubru, tan ne’e hein katak sei laiha tán mudansa ba númeru kandidatu inklui kaléndariu ne’e.

Entretantu, totál Ensinu Báziku Sentrál (EBC, sigla portugés) iha RAEOA hamutuk 18 ho númeru kandidatu rekapitulasaun ba ezame nasionál 2022 hamutuk na’in-1.860 sei akumula sala aprendizajEn hamutuk 98.

Nune’e mós ba Ensinu Sekundáriu Jerál (ESG, sigla portugés) hamutuk eskola hitu (7) ho númeru kandidatu ba ezame nasionál hamutuk 869 sei akumula sala aprendizajen hamutuk 48.

Nomoos ba Ensinu Tékniku Vokasionál (ETV) hamutuk haat, ho númeru kandidatu ba ezame nasionál hamutuk na’in-469 sei akumula sala aprendizajen hamutuk 27.

Purtantu kona-bá profesór sira atu halo kontrola iha ezame nasionál tinan ne’e, sei la sufisiente, tan ne’e nia parte sei husu tán apoia hosi profesór voluntáriu sira hodi apoia halo vijilánsia iha tempu ezame nasionál, tanba atu atu foti profesór permanente hosi ensinu báziku bele difikulta ba prosesu sira, entaun uza de’it profesór voluntáriu sira.

Maibé profesór voluntáriu sira sei laiha direitu atu prenxe akta ezame nasionál, maibé sira iha de’it direitu atu halo vijilánsia iha tempu ezame nasionál.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!