BOBONARO, 08 setembru 2022 (TATOLI) – Servisu Rejistu no Verifikasaun Emprezariál, Institutu Públiku (SERVE, I.P), sukursál munisípiu Bobonaro, konsege alista empreza 52 iha postu administrativu Bobonaro.
Koordenadór SERVE sukursál munisípiu Bobonaro, Leopoldo Perreira Fernandes, esplika, programa rejistu móvel ne’ebé lansa iha loron 19 agostu tinan ne’e konsege alista empreza 52 iha postu administrativu Bobonaro.
Programa rejistu movél envolve atividade tolu mak hanesan, ba dahuluk halo kampaña atu introdús prosesu rejistu inklui rekizitu sira-ne’ebé presiza prienxe hafoin fó tempu semana ida, iha faze daruak ekipa sira hahú rekolla dadus atu halo prosesu no faze datoluk mak distribui dokumentu.
Programa pilotu ne’e implementa iha suku lima mak hanesan suku Karabau, Kolimau, Tebabui,Kota-Boot, suku Mali-Ubu no suku Lourba tanba konsidera distánsia dook hosi vila.
Notísia relevante: SERVE, I.P halo verifikasaun ba ajénsia viajen halo rekrutamentu ilegál
“Totál rejistu ne’ebé ita konsege rekolla iha ne’ebá hamutuk 52, fahe ba negosiante feto 11, barak-liu hosi Mane 4. Sira-ne’e mak entrega dokumentu kompletu ho sira-nia atividade barak-liu kioske, hakiak animál, loke karpintária no prodús batako,” nia informa ba Jornalista sira, iha kna’ar-fatin, Maliana, kinta ne’e.
Enkuantu hosi empreza 52 ne’e konsege rejista kompañia Unipesoal Lda tolu no restante ne’e empreza individuál.
Enkuantu hosi númeru ne’e, sira-ne’ebé dokumentu kompletu na’in-23 mak tuir prosesu normál tanba aprovadu. Nune’e loron 5 setembru to’o 7 fulan-setembru konsege distribui fali dokumentu sira empreza selesionada.
Responsavél SERVE,I.P munispál ne’e haktuir, durante ne’e prosesu rejistrasaun empreza sira iha lamentasaun mak rekizitu sira, tanba presiza Billete Identidade, eleitorál no bainhira empreza ne’ebé nia estadu sivíl kazadu no kazada tenke komprova ho sertidaun kazamentu.
Nune’e mós públiku prekupa edifísiu SERVE,I.P sukursál Bobonaro ne’ebé lokaliza iha Vila de’it, entaun sira-ne’ebé hela ho distánsia dook la konsege asesu informasaun kona-bá prosesu rejistu komersiál
“Sira-nia sentimentu ne’ebé hato’o katak sira kontente ho SERVE nia prezensa ne’ebé mak hakbesik-aan ba iha suku, atu nune’e sira bele sente prezensa Governu liuhosi instituisaun SERVE fó asisténsia ba sira atubele hetan dokumentu negósiu nian,” nia haktuir.
Koordenadór ne’e promete ba oin programa rejistu emprezariál movél ne’e kuandu identifika empreza sira barak mak laiha dokumentu, sei envolve mós Diresaun Munisipál Konservatóriu Servisu Rejistu Notáriadu (DMCSRN) munisípiu Bobonaro nune’e bele fasilita emprea sira asesu Billete Identidade (BI).
Programa rejistu movél ne’e tuir planu sei implementa iha postu administrativu Lolotoe, kontinua ba Balibo no sei kobre postu hotu ne’ebé distánsia dook hosi vila.
Notísia relevante: SERVE, I.P ezekuta ona 34,9% OJE 2022 iha trimestre dahuluk
Jornalista: Sérgio da Cruz
Editór: Evaristo Soares Martins
