VIQUEQUE, 08 setembru 2022 (TATOLI)–Progresu konstrusaun fíziku Eskola Sekundáriu Tékniku Vokasionál (ESTV) Rabina aldeia Aidac Laran, suku Dilor, postu administrativu Lacluta, munisípiu Viqueque, daudaun ne’e atinje 40%.
“Ami fiar katak iha tinan ida-ne’e nia laran kompañia bele finaliza konstrusaun, tarde liu sei hotu iha tinan oin,” Koordenadór ESTV, Rosito Soares Morais, hateten ba Agência Tatoli, iha Lacluta, kinta ne’e.
Konstrusaun ne’ebé toma konta hosi kompañia Lufiamor Unip, Lda, kompostu hosi edifísiu sala aula, sala profesor no sanitária.
“Ita hasoru dezafiu hanesan udan, entaun kompañia hasoru difikuldade bainhira distribui materiál konstrusaun maibé dezafiu sira-ne’e la sai obstákulu hodi hala’o konstrusaun,” nia akresenta.
Notísia relevante: Marsu 2022, hahú konstrusaun ESTV Ravina Lacluta Viqueque
Nia dehan, konstrusaun edifísiu ESTV Rabina Lacluta ho kualudade di’ak, nune’e nia husu nafatin kompañia mantein kualidade hodi edifísiu bele uza ba tempu naruk.
“Kona-ba rai konstrusaun edifísiu, komunidade sira oferese rai hamutuk ektare lima, ne’ebé ektare rua sei konstrui edifísiu no ektare tolu eskola uza halo to’os hodi kuda planta sira iha laran,” nia tenik.
Orsamentu ba konstrusaun eskola hamutuk $347.806,68, kompostu hosi sala neen, eskritóriu ida no sentina ida, ne’ebé prevee ona iha tinan 2021.
Dadus estudante hosi klase 1 to’o klase 3 hamutuk na’in-146 no profesór hamutuk na’in-14.
Jornalista : Vitorino Lopes da Costa
Editora : Julia Chatarina
