iklan

NASIONÁL, HEADLINE, POLÍTIKA

Taur ko’alia ‘pasadu no futuru’ iha ámbitu kongresu da-V FRETILIN

Taur ko’alia ‘pasadu no futuru’ iha ámbitu kongresu da-V FRETILIN

Primeiru-Ministru, Taur Matan Ruak, akompaña hosi Prezidente Partidu FRETELIN, Francisco Guterres ‘Lú Olo’, Sekretáriu Jerál, Mari Alkatiri no segundu jerasaun membru partidu FRETILIN, Lere Anan Timur, iha abertura kongresu nasionál ba da-V iha CCD, kinta (08/09). Imajen Tatoli/António Daciparu

DILI, 08 setembru 2022 (TATOLI)–Prezidente Partidu Libertasaun Popular (PLP) no atuál Primeiru-Ministru (PM), Taur Matan Ruak, ko’alia asuntu rua hanesan pasadu no futuru bainhira partisipa iha kongresu partidu Frente Revolusionária Timor-Leste Independente (FRETILIN) ba da-V, ne’ebé hala’o iha Sentru Konvensaun Dili (CCD, sigla portugés), kinta ne’e.

“Ida ko’alia pasadu oituan tanba dala barak ita haluha, hodi ita lembra ita-nia istória tanba istória hanesan alersese hodi sustenta ita-nia nasaun, organizasaun, sosiedade, sobrevivensia ba futuru. Segundu mak ha’u koalia futuru oituan tanba ha’u la fiar katak prezente iha, prezente ne’e normalmente ema dehan enquadra estante cinco e cinco minutos as veses o presente já passou, por isso não existe presente, existe sim, existe passado e future,” Taur Matan Ruak, hateten.

Notísia relevante: Lú Olo: kongresu FRETILIN dalimak hametin prinsípiu lori naroman ba povu

Nia relembra katak tinan 12 servisu ba FRETILIN no tinan 14 servisu ho FRETILIN, nune’e líder partidu ne’e sobrevivente.

“Primeira jerasaun oituan loos maibé lori sira maka ohin ita hotu haksolok, lori sira mak ita afirma no reafirma ita-nia rain hanesan nasaun no povu, sira-nia jerasaun hanesan jerasaun ambisiozu, lutadór, jerasaun rejiste, persiste no larejiste, kada momentu sira-nia istória sira rezojenese, polifika, konsolida no sira ba oin la interese dezafiu saida mak iha,” nia konta tuir.

Tuir nia, hafoin restaurasaun indepedénsia, objetivu liberta povu iha tinan ikus ne’e mak hametin demokrasia no páz, ne’ebé iha país balun tinan 20 bele halo milagre maibé Timor-Leste tinan 20 la konsege halo.

Aleinde ne’e, Xefe Governu fó sai mós dadus estatístika nian hodi kongresista sira bele iha koñesimentu ligadu ho situasaun atuál.

“Dadus estatístika hatudu katak populasaun Timor 42% kiak, má nutrisaun 47%, ne’e signifika ita-nia oan sira ne’ebé aban bainrua sai líder ho idade to’o 30, sira-nia kakutak sei la funsiona di’ak tanba sira iha moras. Ita-nia produtividade kiik liu, dependénsia esterna esesivamente, orsamentu biliaun $2 hosi ne’e biliaun $1,7 kada tinan sai ba li’ur, signifika ita iha kapasidade só retein iha ita-nia rain laran. Defise komersiál ida boot maibé osan boot kada tinan sai ba rai-li’ur,” nia esklarese.

Tanba ne’e, eis Xefe Estadu ne’e konsidera partidu kiik sira importante loos iha dezenvolvimentu nasaun maibé responsabilidade boot liu maka partidu boot sira iha ne’e maka Partidu FRETILIN no partidu Congresso Nacional de Reconstrução de Timor (CNRT).

“Timor nia distinu iha FRETILIN no CNRT nia liman, hosi saida mak imi halo. Ha’u nia esperiénsia servisu iha buat rua, ida matenek sira haree dook maibé nunka servisu hamutuk, rua sira ne’ebé la hatene surat-tahan hakarak servisu hamutuk maibé la haree dook,” nia tenik.

Aleinde ne’e, nia konsidera militante FRETILIN iha lideransa na’in-rua (Mari Alkatiri no Lú Olo) forte tebes.

“Ha’u previlejiu loos tanba bele partisipa iha kongresu da-V FRETILIN nian hafoin tinan 40 resin nia laran, tanba ne’e agradese ba estrutura partidu, kongresista sira no observadór hotu. Ha’u-nian dezeju atu kongresu ne’e la’o ho di’ak,” nia adianta.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!