iklan

EKONOMIA, BAUCAU, HEADLINE, MUNISÍPIU

Uma-kain 4.872 iha Baucau sei simu subsídiu bolsa da mãe

Uma-kain 4.872 iha Baucau sei simu subsídiu bolsa da mãe

Diretór Servisu Munisipál Solidariedade Sosial Baucau, Guido Ricardo Belo. Imajen Tatoli/Natalino Belo.

BAUCAU, 08 setembru 2022 (TATOLI) – Uma-kain 4.872 iha munisípiu Baucau sei simu subsídiu bolsa da mãe iha tinan ida-ne’e.

Diretór Servisu Munisipál Solidaridade Sosiál Baucau, Guido Ricardo Belo, esplika, kritéria atu hetan subsídiu bolsa da mãe mak família ne’ebé iha oan no hala’o estudu iha ensinu báziku to’o sekundária idade másimu tinan-17.

“Ita hein hela prosesu pagamentu, ha’u esperu iha ona koordenasaun entre diresaun nasionál asisténsia sosiál ho Banku Nasionál Timor-Leste (BNCTL, sigla portugés) kona-bá mekanismu pagamentu liuhosi konta bankária,” Diretór Servisu Munisipál Solidaridade Sosiál Baucau hateten iha Vila Nova, kinta ne’e.

Servisu solidariedade Baucau kontinua hein orientasaun hosi nasionál tanba daudaun ne’e BNCTL sei kontinua halo pagamentu subsídiu ba idozu no invalides ne’ebé tuir kalendáriu sei finaliza iha setembru.

Kada uma-kain benefisiáriu na’in-tolu ne’ebé kada ema-ida iha fulan-ida sei direitu ba osan hamutuk $5 nune’e kada uma-kain sei simu $180 tinan-ida.

“Objetivu prinsipál hosi subsídiu mak asegura oan sira kontinua asesu eskola, fasilita tratamentu iha fasilidade saúde sira, maske uitoan maibé bele insentiva família,” Guido Belo akresenta.

Hosi tótal benefisáriu uma-kain 4.872 kompostu hosi postu administrativu Baucau Vila hamutuk 1.113 , Laga 779, Baguia 557, Quelicai 765, Vemasse 765 no Venilale 893.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!