iklan

COVALIMA, POLÍTIKA

Ekipa task force kontinua halo operasaun ba animál husik livre iha Suai

Ekipa task force kontinua halo operasaun ba animál husik livre iha Suai

Sekretáriu Administrasaun Munisípiu Covalima, Francisco de Jesus Alves. Imajen Tatoli/Celstina Teles.

COVALIMA, 09 setembru 2022 (TATOLI)–Sekretáriu Administrasaun Munisípiu Covalima, Francisco de Jesus Alves, hateten ekipa task force ne’ebé nia rasik lidera sei kontinua halo operasaun faze daruak ba komunidade nia animál ne’ebé husik livre iha postu administrativu Suai, munisípiu Covalima.

Notísia Relevante: Ekipa task force halo operasaun ba animál la’o livre iha Covalima

Operasaun ba faze daruak iha fulan ne’e sei kontinua halo operasaun ba komunidadenia animál ne’ebé husik livre iha postu administrativu Suai, tanba foin halo sensibilizasaun lei ijiene orden públika númeru 33/3008 ba públiku.

“Iha faze daruak ita foin halo sensibilizasaun ba komunidade iha postu administrativu Suai iha loron 23 fulan agostu. Nune’e, sei implementa iha fulan-setembru nia-laran, hodi halo operasaun ba animál sira-ne’ebé husik livre iha vila laran hanesan kesi iha estrada ninin, iha fatin públiku, iha edifisiu no eskola nia oin,” Francisco de Jesus Alves hateten ba jornalista sira, iha resintu administrasaun Covalima, Sukaer Laran, sesta ne’e.

Autoridade ne’e husu ba intelektuál no sosiedade balun la aseita ba implementasaun lei númeru 33/2008 kona-ba lei ijiene orden públika karik, bele halo kritika ne’ebé ho konstrutivu ho verbálmente no bele liuhosi karta ruma.

Tanba, tuir nia, bainhira ekipa sira halo operasaun hodi implementa lei númeru 33/2008 ne’e bazea ba despaixu hosi administradór munisípiu Covalima tuir lei ijiena orde públika haruka, nune’e bainhira komunidade nia animál ne’ebé husik livre, ekipa task forrce sira hetan no animál refere sei sai ona na’in ba adminitrasaun la fó-fila ba na’in bazea ba artigu 8 hosi lei ne’e.

“Animal sira-ne’e na’in laiha, ita kaer no kesi animál hirak ne’e nia na’in mak administrasaun Covalima bazea ba lei iha artigu 8 ne’ebé hateten kona-ba kompeténsia administrasaun munisípiu atu ezekuta karik kaer animál sira-ne’e sei sai na’in ba administrasaun,” nia hateten.

Antes ne’e, operasaun ba faze dahuluk ekipa task force hala’o ona operasaun ba komunidade nia animál ne’ebé husik livre iha postu administrativu Tilomar, munisípiu Covalima, ne’ebé halo sensibilizasaun dahuluk iha loron 27 fulan jullu no iha loron 27 fulan agostu halo operasaun.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!