VIQUEQUE, 09 setembru 2022 (TATOLI)–Servisu Ministériu Agrikultura no Peska (MAP) munisípiu Viqueque husu abitante sira labele estraga no tesi ai-parapa sira ne’ebé moris iha tasi ninin tanba daudaun ne’e ema tesi estraga hotu ona iha área postu administrativu Uatulari, munisípiu Viqueque.
“Ha’u husu komunidade iha Uatulari atu labele tesi ai-parapa sira ne’ebé moris besik tasi ninin sira iha Uatulari. Uluk ai-parapa sira iha área Uatulari barak maibé ita agora haree besik hotu ona. Ho ida-ne’e ami husu komunidade hapara ona tesi ai-parapa sira-ne’e,” Diretór MAP Viquequr interinu, Carlos Pinto, hateten iha ninia knaar fatin, Beloi, sesta ne’e.
Notísia relevante: SEA-empreza GAIA asina akordu komersializa karbonu no reflorestasaun ai-parapa
Carlos haktuir, tinan tolu ba kotuk MAP Viqueque serbisu hamutuk organizasaun internasionál kuda ai-parapa, hahú hosi Uatucarbau no Natarbora, maibé parte Uatulari maka seidauk kuda.
“Komunidade tesi ai-parapa iha Uatulari besik hotu ona. Iha Uatulari ita iha kazu dala-tolu ona, ema ba tesi laiha lisensa ruma sira ba tesi ilegál. Nune’e, ha’u orienta ona guarda florestál sira hodi haree no motoriza ai-parapa sira iha postu Uatulari,” nia akresenta.
Daudaun ne’e guarda florestál sira sei kontinua haree hodi halo atuasaun ba ema sira ne’ebé tesi ai-parapa sira iha Uatulari.
“Problema maka ita ba monitoriza loron, enkuantu ema ba tesi no loro sai kalan, maibé ita laiha dadus. Ami kontinua buka hatene sé loos maka tesi,” nia tenik.
Ai-parapa nia durasaun moris presiza tempu naruk hafoin boot, tanba ne’e presiza kuida ne’ebé sei iha.
Antes ne’e, MAP Viqueque halo ona sosializasaun ba komunidade atu labele estraga no tanba ai-horis ne’e bele satán tasi-been no fó mahon ba ikan sira.
“Maibé komunidade nafatin la kompreende hodi ba estraga ai parapa sira-ne’e, esplika ba komunidade sira ba tesi nafatin,” nia dehan.
Tuir dadus, ai-parapa iha parte Uatulari hosi bee ain Belia to’o área natar la liu, kuaze ektare 80, maibé komunidade kuaze estraga hotu ona.
“Ami nafatin husu komunidade labele estraga ona ai-parapa sira atubele moris iha tasi-ninin sira,” Diretór ne’e hato’o.
Jornalista : Vitorino Lopes da Costa
Editora : Julia Chatarina
