iklan

DEFEZA, HEADLINE

Operasaun konjunta F-FDTL-PNTL la tolera kriminozu ne’ebé kria instabilidade sosiál

Operasaun konjunta F-FDTL-PNTL la tolera kriminozu ne’ebé kria instabilidade sosiál

Xefe Estadu Maiór F-FDTL, Tenente Jenerál Falur Rate Laek no Segundu Komandante Komísariu PNTL, Mateus Fernandes, asina akordu kopersaun kona-ba estabelesimentu operasaun konjunta iha teritóriu nasionál, iha salaun Kurtel Jeneral Fatuhada Dili, sesta (09/09). Imajen Tatoli/ Francisco Sony

DIILI, 09 setembru 2022 (TATOLI)— Komandu FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL), sesta ne’e, selebra akordu diretiva hodi hala’o operasaun konjunta ho medida rigorozu kona-ba regra empeñamentu ba trankuilidade seguransa internál nian iha territóriu nasionál.

Iha operasaun konjunta ne’e, FALINTIL-Forsa Defeza Timor-Leste (F-FDTL) ho Polísia Nasional Timor-Leste (PNTL) sei la tolera kriminozu sira ne’ebé tenta kria instabilidade Operasaun konjunta F-FDTL-PNTL la tolera kriminozu ne’ebé kria instabilidade sosiál.

Notísia relevante: Governu aprova regra operasionál konjunta F-FDTL no PNTL kontrola sidade Dili

Regra no empeñamentu operasionál konjunta entre forsa rua ne’e liuhosi operasaun patrullamentu ba territóriu nasionál tomak no vijilánsia espesiál no kontrolu ba fatin hotu-hotu ne’ebé konsidera sensível iha sidade Dili atu prevene no hapara situasaun kriminoza hosi indivíduu sira ne’ebé kauza instabilidade sosiál.

Ho nune’e,  Komandu rua ne’e estabelese diretiva atu komandu rua serbisu hamutuk atu halo operasaun konjunta,  atua situasaun seguransa iha territóriu nasionál, liuliu iha kapital Dili ne’ebé ikus-ikus ne’e la hakmatek tanba kauza hosi konfrontu Grupu Arte Marsiál (GAM) no Grupu Arte Rituál (GAR).

Xefe Estadu Maiór F-FDTL, Tenente Jenerál Falur Rate Laek. Imajen Tatoli/Francisco Sony

“Ami asina diretiva konjunta ne’e, apartir agora ba oin instituisaun rua ne’e F-FDTL no PNTL, serbisu hamutuk hodi halo operasaun konjunta iha nivél nasionál hodi foti medida rigorozu atua situasaun ne’ebé maka ikus-ikus  ne’e mosu iha ita nia rai, nune’e ita bele kria pás no estabilidade nasionál,” Xefe Estadu Maiór Jenerál F-FDTL, Tenente Jenerál Falur Rate Laek, hateten, ba jornalista sira liu hosi Konferénsia Imprensa iha Kuartél F-FDTL, Fatuhada, sesta ne’e.

Tenente Jenerál ne’e dehan, iha operasaun konjunta ne’e F-FDTL no PNTL utuliza arma hodi atua situsaun, tanba militár no polisia ne’e treinadu uza arma.

“Labele duvida fali ba instituisaun rua ne’e, kuandu ka’er kilat tanba militár no polisia ne’e loron-loron treinadu ka’er kilat, atu tiru ka la tiru ne’e iha regra serbisu operasionál nian,” Falur apela.

Iha operasaun konjunta ne’e, Komandante F-FDTL ne’e garante laiha tan membru GAM no GAR maka tenta halo perturbasaun públiku iha tempu loron ka kalan, se akontese mak Komandu rua ne’e atua no husu grupu hirak ne’e nia responsablidade. Tanba, dirijente GAM no GAR rasik kompremetidu ona atu kontrola nia membru sira hodi kontribui ba pás no estabilidade.

“Husu ba inan aman no sidadaun hotu atu kontrola oan sira liuliu joven-sira atu tenke kontribui ba pás no estabilidade iha rai ne’e, tanba krime ne’ebé maka mosu ne’e barak joven sira ne’ebé maka moris iha era 2000 tesik mai mak komete,” Falur apela.

Komandu F-FDTL no PNTL mós husu ba polítiku sira atu labele politiza situasaun, nune’e bele kontribui ba estabilidade nasionál. Tanba ho situsaun violénsia sira ne’ebé mosu iha semana ikus ne’e halo instituisaun rua ne’e nia kreabilidade tuun tanba dehan instituisaun rua ne’e la profisionál hodi halo intervensaun ba kazu ruma.

Tanba ne’e, Tenente Jenerál Falur Rate Laek, husu ba ekipa operasaun konjunta entre F-FDTL ho PNTL atu hatudu sira nia-brani no preparadu atu responde situasaun ne’ebé di’ak no aat.

Iha biban hanesan, Segundu Komandante Jerál PNTL, Komisáriu Mateus Fernandes, hateten, diretiva ne’ebé maka komandu rua asina ne’e atu responde konfrontu liuliu asidente ne’ebé akontese iha Akadiru-hun ne’e implika situasaun seguransa iha rai laran

Segundu Komandante Komísariu PNTL, Mateus Fernandes. Imajen Tatoli/Francisco Sony

“PNTL ho F-FDTL sai hanesan instituisaun ne’ebé defende legalidade demokrátiku, sei atua ho rigorozu tuir rega sira iha empeñamentu konjunta nian, hodi garante trankuilidade seguransa interna nian,” Komisáriu ne’e afirma.

Tanba, nia dehan kazu konfrontu iha área Bidau Akadiruhun, ne’ebé konsege hakanek membru F-FDTL ida hosi Komponente Navál ne’e hanesan insidente ne’ebé komplika tebes situasaun seguransa no estabilidade nasionál iha rai-laran.

Nune’e, Governu deside hasai rezolusaun atu komandu F-FDTL ho PNTL bele estabelese operasaun konjunta hodi garante pás no estabilidade atu populasaun hotu sente seguru.

“Komandu rua ne’e sei implementa diretiva ne’ebé maka komandu rua ne’e estabelese liuhosi akordu atu nune’e bele fó fali trankuilidade ba populasaun sira iha territóriu nasionál, liuliu iha kapitál Dili,” nia afirma.

Entretantu, Governu liuhosi reuniaun Konsellu Ministru (KM), aprova projetu Rezolusaun Governu ne’ebé autoriza no aprova regra sira ba empeñamentu operasionál konjuntu entre FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL).

Projetu rezolusaun ne’e aprezenta hosi Ministru Interiór no Primeiru-Ministru, Taur Matan Ruak no Ministru Defeza ein ezersísiu no atuál Ministru Prezidénsia Konsellu Ministru, Fidelis Manuel Leite Magalhães.

Rezolusaun Governu ne’e tama iha vigór hosi data asinatura no termina iha tuku 23:59 loron 13 setembru tinan 2022, ne’ebé bele renova bainhira mosu kondisaun hanesan filafali.

Rezolusaun Governu ne’e hodi reforsa liután medida hirak ne’ebé iha, liuhosi despaisu ne’ebé Ministru Defeza, Filomeno da Paixão de Jesus no Vise-Ministru Interiór, António Armindo, asina ona kona-ba patrullamentu konjuntu.

Bazeia ba depaisu ne’e, Governu fó ona autoriza atu hala’o operasaun konjunta F-FDTL no PNTL hodi hala’o vijilánsia no kontrola maka’as ba fatin sira ne’ebé iha risku iha sidade Dili atu minimiza violénsia no aktu kriminál iha territóriu nasionál, hodi garante pás no estabilidade iha Timor-Leste.

Notísia relevante: PNTL-F-FDTL hahú hala’o operasaun konjunta hodi garante pás no estabilidade

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!