DILI, 09 setembru 2022 (TATOLI)—Prezidente Konsellu Administrasaun Portuáriu Timor-Leste (APORTIL), Lamartinho de Oliveira, hateten, ró-ahi Berlin Nakroma ne’ebé daudaun halo manutensaun iha Surabaya, Indonézia, iha setembru nia laran sei halo viajen mai Timor-Leste.
“Manutensaun ro-ahi Berlin Nakroma iha Surabaya daudaun ne’e hotu ona no tuir informasaun iha loron 15 setembru sei sai hosi Indonézia no viajen loron-lima sei to’o mai Timor-Leste,” Lamartinho de Oliveira, informa ba Agência Tatoli, iha ninia knaar fatin, APORTIL, Colmera, sesta ne’e.
Notísia relevante: Ró Berlin Nakroma arranka ona ba Indonézia halo manutensaun
Ró-ahi Berlin Nakroma mai tarde oituan tanba empreza Ocean Timor seidauk selu osan ba Badan Klasifikasi Indonesia (BKI) atu hasai sertifikadu ró.
“Ohin ha’u kontaktu ona ba Ocean Timor atu selu osan $30.000 ne’e ba BKI, nune’e sira autoriza ró ne’e mai,” nia akresenta.
Iha semana kotuk Prezidente Konsellu Administrasaun APORTIL no parte tékniku sira halo vizita ba Surabaya hodi haree prosesu manutensaun ró-ahi no koko kedas ró halo teste sea trials, hodi koko kondisaun ró.
Kustu reparasaun ró-ahi Berlin Nakroma hosi empreza mak hasai hamutuk $400.000.
Na’in ba empreza Ocean Timor, Boby, konfirma, ohin nia parte simu ona xamada telefone hosi APORTIL, nune’e semana oin sei simu osan hosi Governu hodi lori osan ne’e ba selu iha BKI no lori ró Berlin.
Jornalista : Arminda Fonseca
Editora : Julia Chatarina
