Sobrevivente masakre Tumin husu lídér nasionál liberta povu hosi kiak

OÉ-CUSSE, 09 setembru 2022 (TATOLI) – Sobrevivente sira hosi Masakre Tumin, suku Bobometo, sub-rejiaun Oésilo, Rejiaun Administrativa Espesiál Oé-Cusse Ambeno (RAEOA), husu líder istóriku sira atu unidade hodi liberta povu hosi kiak no mukit.

Tuir sobrevivente Marcos Baquin, haree katak, dezenvolvimentu iha Timor-Leste seidauk la’o, hafoin hetan independénsia, tanba líder istóriku sira laiha unidade.

“Kada períodu Governu ida sa’e serbisu tuir saida mak nia planeia ona, entaun programa anteriór sira abandona, depois dehan povu mak vota sala, maibé tuir loloos, líder istóriku tenke serbisu hamutuk, uluk luta hamutuk to’o hetan ukun rasik-an, tanba saida mak to’o ohin loron luta atu liberta povu hosi kiak no mukit, idak-idak la’o ninian, ami sente laran moras kuandu haree aman sira laiha unidade atu haree povu nia preokupasaun,” sobrevivente Marcos Baquin, ko’alia iha Masakre Tumin, suku Bobometo, Oé-Cusse, sesta ne’e.

“Ami hakarak maun Xanana nu’udar komandante FALINTIL, maun Taur, Lú Olo, Lere Anan Timur, maun Mari Alkatiri, ita-nia Prezidente atuál tenke unidade, atu nune’e ami mós sente kontente,” nia katak.

Maibé realidade hatudu iha palku polítiku laiha unidade entaun nasaun nia futuru atu sai oinsá, agora jerasaun foun mai komesa barak ona entaun tenke enkorajaa no hanorin sira atu aban bairua maun sira laiha, jerasaun foun bele kontinua lidera rai ne’e sai di’ak liután.

Sobrevivente Pedro Cono, hateten,  ukun an ona tinan 21 ona, tenke haluha no hakribi violénsia, presiza hametin unidade nune’e kontribui dezenvolve rai ida-nee, tanba uluk terus ona agora labele terus tán.

“Hotu-hotu serbisu lori ita-nia nasaun ne’e ba dame no pás, tanba ita manán rai ne’e sosa ho ruin no ran la’ós ema mai fó de’it,” Pedro Cono afirma.

Sobrevivente Martinho Bobi, hatete, povu Timor-Leste nia mehi iha tempu okupasaun hakarak haketak-aan hosi Indonézia tanba halo povu sai atan iha nia rain rasik, tanba pasiva atu asesu iha edukasaaun, asesu ba dezenvolvimentu hanesan estrada eletrisidade, saúde no seluk tán.

“Tan ne’e ita ukun-aan no haketak ona tenke hadi’a povu nia moris, ita haree iha situasaun agora líder sira defende liu ba polítika partidária, defende partidu hodi hatún malu, hamoe malu no hamonu malu, ikus mai povu terus nafatin, ami husu presiza hamutuk atu habelar nafatin dezenvimentu iha Timor-Leste,” nia husu.

Notísia relevante: https://tatoli.tl/2021/09/10/masakre-tumin-milisia-oho-ema-nain-10-iha-08-setembru-1999-i/

Jornalista: Abílio Elo Nini
Editór: Evaristo Soares Martins