DILI, 09 setembru 2022 (TATOLI)— Fundu ba Populasaun Nasaun Unida (UNFPA) no Universidade Nasionál Timor Lorosae (UNTL) Fakuldade Medisina no Siénsia Saúde, sesta ne’e, hala’o lansamentu laboratóriu prátika ba Departamentu Superiór Parteira.
“Ohin, ita halo lansamentu no entrega laboratóriu ba Universidade Nasionál Timor Lorosa’e (UNTL), liuliu Departamentu Parteira hodi hala’o sira nia prátika hafoin tuun ba fasilidade saúde hodi ka’er pasiente sira,” Reprezentante Interina UNFPA iha Timor Leste, Domingas Bernardo, hateten iha nia diskursu.
UNFPA durante ne’e apoia eskola parteira iha tinan 2008 ho ekipamentu oituan no konstrui laboratóriu tanba importante tebes ba eskola medisina, parteira no enfarmajen atu hala’o prátika, hafoin tuun ba iha baze hodi halo atendimentu saúde ba pasiente sira.
Tanba ne’e, nia dehan ho laboratóriu ne’e bele ajuda tebes estudante sira halo prátika molok tuun ba terenu hodi halo atendimentu ba inan-isin rua sira ne’ebé mak atu partu.
“Orsamentu ne’ebé apoia ba ekipamentu laboratóriu prátika ba parteira ne’e hamutuk $50.000,” nia afirma.
Iha fatin hanesan, Reitór Universidade Nasionál Timor Lorosae (UNTL), João Martins agradese ba UNFPA ne’ebé mak apoia ona laboratoriu ba estudante parteira sira tanba fasilita tebese atu halo prátika, hafoin tuun ba terenu.
Ekipamentu laboratóriu ne’ebé UNFPA apoia mak hanesan armáriu, meza no ekipamentu prátika sira seluk.
“Husu ba estudante no profesór sira uza ho didi’ak atubele ba to’o iha objetivu edukasaun nian hodi hadi’a kompeténsia parteira nian bainhira termina estudu karik iha ona kapasidade hodi halo atendimentu ba sosiedade liuliu inan no oan sira,” João Martins agradese.
Alende ne’e, estudante ne’ebé ativu hala’o estudu iha Departamentu Parteira no fakuldade Medisina Siénsia Saúde iha UNTL hamutuk 1.334.
Jornalista : Fellicidade Ximenes
Editór : Florencio Miranda Ximenes
