DILI, 09 setembru 2022 (TATOLI) – Líder Karizmátiku no Eis Prezidente Repúblika, Kay Rala Xanana Gusmão, husu ba grupu joven-sira iha territóriu nasionál atu hametin unidade hodi kria pás no estabilidade iha nasaun ne’e, tuir valór no prinsípiu ne’ebé jerasaun tuan sira luta iha tempu pasadu to’o ikus hetan ukun rasik-aan.
“Joven sira imi tenke hametin unidade, imi tenke hanoin imi nia aman, inan, avó sira hotu nia terus no mate tanba hamlaha, inimigu oho, terus ba kastigu mak ohin loron ita hetan independénsia, ho nune’e imi tenke hadomi malu,” dehan Líder Nasionál ne’e, hafoin fila hikas mai Timor-Leste, iha aeroportu Prezidente Nicolau Lobato-Comoro, sesta ne’e.
Xanana dehan nasaun ne’e ukun-aan ona no sei entrega ba jerasaun foun sira atu lori ba oin ho nune’e tenke respeita malu labele kria inimigu ba malu, maibé kontinua hadomi malu.
“Katuas sira lakon hotu ona, antes katuas sira lakon hotu ona nasaun ne’e entrega hela ba imi oan sira. Tanba ne’e imi lakon tiha espiritu sidadania bainhira imi boot, imi la hatene eduka imi nia oan sira tanba imi nia ezemplu fó daudaun, hatudu daudaun fahe malu, baku malu no oho malu, ne’e ezemplu la di’ak ida,” Xanana lamenta.
Ho nune’e, hanesan líder ida iha Timor – Leste apelu ba joven hotu sente-an nu’udar sidadaun rai ne’e nia oan tenke buka respeita malu, hahú hosi uma laran sai to’o liur hodi hametin armonia iha sosiedade.
“Ohin, loron labarik sira maioria lakon tempu ba de’it média sosiál hanesan google, facebook, WhatsApp no seluk tan hodi kria mak problema. Imi utiliza média sosiál sira hodi akompaña uitoan mundu ba,” Eis Prezidente Repúblika ne’e enkoraja.
Xanana husu nafatin ba joven sira, hadomi malu no fó liman ba malu kria dame iha nasaun laran atu hatudu ba mundu katak Timor – Leste nasaun ne’ebé hakmatek. Tanba jerasaun tuan sira mate sei husik hela nasaun ne’e ba jerasaun foun sira nia liman, nune’e prepara aan nafatin hodi lori nasaun ne’e ba oin.
“Ha’u triste tebes tanba imi joven sira lakon tiha espiritu sidadania,” nia afirma.
Jornalista: Hortencio Sanchez
Editór : Florencio Miranda Ximenes
