DILI, 10 setembru 2022 (TATOLI)–Diretór Eskola Ensinu Bázika Sentrál (EBC, sigla portugés) 30 Hera, Sancho Menezes, hateten, eskola ne’e daudaun ne’e presiza morru protesaun, nune’e animál labele estraga ambiente eskola.
“Ita-nia difikuldade mak morru eskola ladún seguru tanba dala ruma ami kuandu sai, animál tama iha kintál laran. Hosi ne’e, ami koloka ona alunu no profesór ida maibé la seguru, tanba morru mak grave tebes,” Diretór eskola informa ba Agência Tatoli, iha ninia knaar fatin, Hera, sabádu ne’e.
Notísia relevante: EBC Esperansa da Pátria Modelu ba Programa Eskola Verde iha Timor-Leste
Eskola públiku ne’e hahú laiha morru iha tinan 2021 to’o agora, nune’e animál sira tama hodi estraga ambiente eskola.
“Ami-nia planu hakarak halo karta ida ba Sekretaria Estadu Ambiente atu mai halo netik verde ba eskola, maibé morru laiha ami labele halo buat ida. Tanba ne’e, ami husu ba Governu, liuliu Ministériu Edukasaun Juventude no Desportu atu rezolve morru, atu nune’e ami bele halo atividade eskola verde no kapasita estudante sira,” nia akresenta.
Daudaun ne’e estudante iha Eskola EBC 30 Hera hamutuk 907, kompostu hosi siklu 1,2,3, enkuantu totál profesór hamutuk 26, ne’ebé mai hosi kontratadu, permanente no voluntáriu.
Jornalista : Nelia Fernandes
Editora : Julia Chatarina
