Estudante EBC Suai Loro na’in-96 preparadu tuir ezame nasionál
COVALIMA, 19 setembru 2022 (TATOLI)—Diretór EBC Suai Loro, Francisco Mendonça Babo hateten, Estudante Eskola Bázika Central (EBC) Suai Loro na’in-96 preparadu atu tuir ezame nasionál.
“Ha’u atu informa estundante iha Eskola Bázika Centrál (EBC) Suai Loro sira preparadu atu tuir ezame nasionál, bazea dadus loloos mak estudante na’in-99 maibé estudante na’in-tolu (3) forma ona família. Tanba ne’e, estudante na’in-96 mak tuir de’it ezame nasionál,” Francisco Mendonça Babo informa ba Agência Tatoli, iha nia kna’ar fatin Suai Loro, segunda ne’e.
Ho nune’e, dadus hirak ne’ebé haruka ona nasionál mak hanesan estudante sira-nia valór ezame, hahú setimu ano to’o oitavu ano primeiru períodu no terseiru períodu haruka ona ba nasionál ho ezame tinan fiskal 2022 primeiru períodu no segundu períodu ba ekipa ezame nasionál.
Ezame nasional ba tinan ne’e di’ak, tanba Ministériu Edukasaun Juventude no Desportu haruka ona matrix ezame nasional mai antes ona, materiál ne’ebé atu fó sai iha ezame nasionál ho nune’e profesór hanorin estudante bazea ba matrix.
Bazea ba dadus hosi Servisu Edukasaun Munisípiu Covalima, estudante sira-ne’ebé atu tuir ezame nasionál hamutuk na’in-2,812 ne’ebé kompostu hosi estudante ensinu báziku na’in-1.761, ensinu sekundáriu jerál na’in-800 no ensinu tékniku vokasionál estudante hamutuk na’in-251.
EBC Suai Loro presiza konstrui moru protesaun
Aleinde ne’e, Diretór Eskola Bàziku Centrál (EBC) ne’e hateten, EBC Suai Loro presiza konstrui moru protesaun atu asegura ambiente eskola no estudante sira hetan asidente tráfegu.
“Ami presiza moru Protesaun Tanba EBC Suai Loro besik iha estrada protokolu, nune’e evita estudante sira afeta ba asidente tráfegu no jardin iha eskola,” Francisco Gonçalves Babo hateten ba Agência Tatoli, iha nia kna’ar fatin, Suai Loro, segunda ne’e.
Tanba, nia dehan, tuir esperiénsia iha tinan 2019-2020 akontese ona asidente tráfegu iha EBC Suai Loro maibé rezolve de’it liuhosi família.
Razaun atu konstrui moru protesaun atu fasilita mós profesór kontrola estudante sira no animál sira labele estraga jardin iha eskola.
Konstrui moru protesaun ne’e parte dalan protokolu eskola oin konstrui moru metru 140, eskola kotuk metru 50, parte loromonu konstrui metru 170 no parte lorosa’e metru 100.
Maske nia parte haruka ona proposta ba PNDS atu konstrui moru protesaun, maibé PNDS sei konstrui iha tinan oin.
“Ha’u haruka ona proposta ba Programa Nasionàl Dezenvolvimentu Suku (PNDS) atu konstrui moru protesaun hodi asegura ambiente eskola no estudante maibé bazea ba rezultadu tinan oin foin konstrui moru,” nia dehan.
Estudante iha EBC Suai Loro hamutuk 700 ho nune’e susar atu kontrola, tanba diretor mós submete ona proposta atu hodi konstrui moru hodi kuidadu ambiente eskolár hanesan Jardin.
Bazea ba proposta ne’e, PDNS sei responde iha tinan oin bele konstrui ona moru protesaun ba eskola EBC Suai Loro.
Jornalista : Celestina Teles
Editór : Cancio Ximenes
