CCF sei realiza konferénsia nasionál iha novembru diskute programa polítika
DILI, 11 setembru 2022 (TATOLI)— Partidu Frente Revolusionária Timor-Leste Independente (FRETILIN) sei realiza tán konferénsia nasionál bodi diskute programa polítika partidu nian.
Prezidente Komisaun Nasionál Preparasaun no Organizasaun Partidu FRETILIN, Flávio Maria da Silva, hateten, kongresu ne’e sei dirije hosi estrutura Komité Sentrál FRETILIN (CCF, sigla portugés).
Nia dehan, membru sira-ne’ebé simu ona pose ne’e hetan diskusuan maka’as, tanba delegadu sira entuziasmu atu hola parte ba CCF ho objetivu atu serbisu maka’as liután ba 2023.
“Lista ida-ne’e tama fofoun halo diskusaun sujestaun ikus mai hadi’a fila-fali lista ne’e konsege aprova liuhosi votasaun ho votu 688 ba membru CCF mandatu 2022-2027, membru CCF estatutu uluk ne’e membru efetivu hamutuk 65, suplentu 25, daudaun kongresu mós aprova rezolusaun ida hodi aumenta membru CCF ne’e ba 100 efetivu 75 no suplentu 25,” Flávio Maria da Silva hateten, iha Sentru Konvensaun Dili (CCD, sigla portugés), domingu ne’e.
Nia hatutan, maske liuhosi kongresu aprova ona rezolusaun aumenta membru CCF ba 100, maibé estatutu seidauk aprova, kongresu rekomenda atu halo diskusaun ida intensivu liu iha konferénsia nasionál sei konvoka iha fulan novembru 2022.
“Novembru ne’e sei iha konferénsia nasionál ida ho objetivu atu diskute manuál no programa polítiku. Ne’e programa FRETILIN no diskute mós teze kongresu nasionál da-V atu hamorin programa kompromsiu eleitorál ba 2023, tanba daudaun ne’e ami tempu la to’o, entaun iha kongresu ne’e rekomenda atu fulan novembru ne’e iha fali konferénsia nasionál ida,” nia dehan.
Nune’e, hosi membru CCF ne’ebé simu ona pose ne’e komposta hosi balansu jéneru feto nia partisipasaun 30% tanba lei obriga tenke iha involvimentu 30% iha estrutura hotu.
Nia hateten, atu sai membru CCF ne’e nia kritéria mak estatutu CCF ne’e ko’alia kona-ba perfil, tenke timor-oan, militante FRETILIN maizumenus tinan lima no hatene istória FRETILIN nian.
Iha ámbitu kongresu ne’e propoin halo revizaun ba estutu partidu nian, liuliu iha artigu balu halo aditamentu, mak iha artigu tuan 103 sa’e ba 114 maibé ida ne’e foin proposta seidauk iha aprovasaun, kongresu rekomenda ona ba konferénsia nasionál.
“Proposta revizaun ne’e maihosi proposta kongresista sira, no revizaun estatutu artigu nian, nune’e iha mós artigu balu foun, balu aditamentu, alterasaun, artigu foun ne’e mak troka lideransa ne’e, no konsellu konsultativu partidu,” nia afirma.
Jornalista : Arminda Fonseca
Editór : Evaristo Soares Martins
