DILI, 11 setembru 2022 (TATOLI)-Frente Revolusionária Timor-Leste Indepedente (FRETILIN), domingu ne’e, selebra aniversáriu transformasaun Asosiasaun Sosiál Demokrata Timorense (ASDT) ba Partidu FRETILIN dala-48.
Komemorasaun loron aniversáriu ba dala-48 Asosiasaun Sosiál Demokrata Timorense (ASDT) transforma ba Partidu FRETILIN, ne’e Sekretariu Jerál Partidu FRETILIN Mari Alkatiri, hateten, desizaun halo transformasaun ne’e tanba hakarak FRETILIN lori naroman ba povu hasai povu hosi nakukun, ba naroman no transformasaun ne’e povu hatán kontente ho determinasaun.
“Ita hotu hatene liafuan naran Maubere la’ós maihosi ita-nia inan-aman fó naran ne’e maibé Maubere ne’e maihosi luta tempu kolonializmu nian mai to’o ita ukun rasik-aan, nune’e ho rezisténsia FRETILIN ba dala-48 ne’e mai ita serbisu hamutuk hahú hosi nasionál to’o baze lori ita-nia povu sai hosi nakukun ba naroman no hosi kiak, mukit ba moris di’ak, tanba ita seidauk konsege lori povu sai hosi nakukun ba naroman no kiak mukit,” Mari Alkatiri, hateten, iha nia diskursu, Sentru Konvesaun Dili (CCD, sigla portugés).
Nia hatutan, FRETILIN presiza serbisu maka’as hasai povu hosi nakukun ba naroman no kiak mukit ba moris di’ak tanba ema barak luta mate ba rai ida ne’e, hakarak lori povu ida-ne’e ba moris di’ak nune’e husu ba militante FRETILIN serbisu maka’as tanba liu tinan 20 Timor-Leste hetan independénsia ho rekursu oinoin maibé povu barak mak sei moris iha nakukun no moris kiak mukit nia laran.
“Tanba luta ba independénsia bainhira forsa Indonézia tama Timor maske
ita kiak no kiik maibé hatudu ba mundu tomak hakarak ukun rasik-aan, nune’e husu ita hotu la’o-tuir ita-nia martir sira-nia luta barak mate ita halo tuir oinsá luta ba povu nia di’ak, la’ós la’o-tuir sira mate, nune’e tempu ona atu halibur ema hotu atu kontinua hanoin ba kotuk tanba situasaun kotuk mak fó forsa ba ita atu la’o ba oin, oinsá hametin nasaun ida -ne’e hadi’ak ita-nia sistema tomak hodi dezenvolvimentu nasionál ba oin,” nia hateten.
Prezidente Partidu FRETILIN, Francisco Guterres Lú Olo, sublima, ho ezisténsia transformasaun ASDT bá FRETELIN, bá dala-48 buat ne’ebé FRETELIN halo mak lori naroman bá povu liuhosi haree bá edukasaun saúde no haree bá situasaun ne’ebé liga realidade ba povu nia moris.
“Ita tenke hanoin bá kotuk, la’ós atu ba kotuk maibé hanoin situasaun ba uluk respitu ba sira hotu ne’ebé mate nia onra, tanba ho sira-nia mate mak ohin loron hotu-hotu hamriik iha rai ida-ne’e nune’e mai hamutuk hamriik metin kaer metin bandeira FRETILIN la’o ba oin, hodi hadi’a povu nia moris,” Lú Olo hateten.
Iha fatin hanesan, Segunda Jerasaun FRETILIN, Lere Anan Timur, hateten, istória FRETILIN hotu-hotu hatene, partidu hotu-hohu nia uma lisan mak FRETILIN, tanba nu’udar partidu lulik lori ba ohin oinsá hasai povu hosi nakukun ba naroman.
“Lideransa sira tempu to’o ona fó liman ba malu, lori nasaun ida-ne’e ba oin, tanba ita-nia moris tuir tempu sei husik mundu ida-ne’e maibé ita tenke rai buat di’ak ida ba rai no partidu FRETILIN nia laran, tanba povu mak FRETILIN no FRETILIN mak povu,” nia hateten.
“Ita FRETILIN tenke konta loloos ita-nia istória nune’e jerasaun seluk labele mai inventa fali istória, no husu ita hadomi ita-nia partidu nune’e domin ne’e bele lori ba partidu seluk maibé domin hahú hosi família, tenke hadomi malu iha partidu laran, no husu ita hotu nia esforsu no sakrifísiu lori naroman ba povu, maibé antes naroman to’o ba povu tenke serbisu maka’as, nune’e ita bele manán iha eleisaun 2023 hodi lori naroman ba povu,” Lere Anan hateten.
Konsilleru Másimu Partidu Kmanek Haburas Unidade Nasionál (KHUNTU), José Naimori Bucar, hateten, partidu FRETILIN nu’udar istória ne’ebé partidu foun sira maihosi hotu FRETILIN nia abut.
“Presiza ita hotu nia kontribuisaun, hamutuk lori nasaun ida-ne’e ba oin, transforma polítika, ne’ebé di’ak hadi’a povu nia moris tanba moto ne’ebé FRETILIN foti lori naroman ba atu atinje ida-ne’e presiza ita hotu serbisu hamutuk,” nia hateten.
Iha tranformasaun ASDT ba partidu FRETELIN ba dala-48 ne’e iha mós serimónia asinatura plaka bá sede FRETELIN nian iha munisípiu sia ne’ebé prontu ona, ne’ebé asina hosi Prezidente partidu FRETELIN, Francisco Guterres ‘Lú Olo’ no Sekretáriu Jerál Partidu FRETELIN, Mari Alkatiri
Jornalista : Arminda Fonseca
Editór: Evaristo Soares Martins