iklan

HEADLINE, SAÚDE

Prezidente Repúblika konsidera jestaun HNGV problema

Prezidente Repúblika konsidera jestaun HNGV problema

Prezidente repúblika, José Ramos Horta iha entrevista ho jornalista sira Darwin. Imajen Tatoli/Rafy Belo

DARWIN, 11 setembru 2022 (TATOLI) – Prezidente repúblika, José Ramos Horta, konsidera jestaun Ospitál nasionál Guido Valadares (HNGV, sigla portugés) iha problema tanba razaun polítika no la iha espiritu ekipa.

“Problema Guido Valadares mak management (jestaun) Diresaun ospitál. Iha mós Ministériu saúde, ita muda ministru ba mai tanba polítika, ita hatama vise-ministru, hatama sekretáriu Estadu tanba partidu la’ós tanba kualidade, la’ós tanba kurríkulu, depois la iha espiritu ekipa em que ospitál hothotu serbisu hamutuk, lae, ospitál mós dada problema oioin,” Xefe Estadu hateten ba jornalista sira hafoin vizita Ospitál Royal Darwin, Austrália, sábadu ne’e.

Prezidente repúblika rekoñese, Primeiru-ministru la’ós haree ba problema saúde de’it tanba ne’e mak iha Ministériu saúde (MS) para tau-matan.

“Iha barak di’ak iha Guido Valadares, ha’u ba iha ne’ebá beibeik, doutór balun di’ak tebes, enfermeiru mós di’ak mas jestaun mak la di’ak,” nia salienta tan.

Nia akresenta, atu sai diretór ospitál ida tenke iha kualifikasaun iha Jestaun negósiu (Bussiness administration) no jestaun ospitalár.

Iha ámbitu Ospitál Royal Darwin, Prezidente repúblika, José Ramos Horta rekoñese katak ospitál ne’e rekoñese katak iha ekipamentu ne’ebé mak di’ak no iha médiku no enfermeiru sira-ne’ebé mak di’ak inklui funsionáriu administrasaun sira.

“Ospitál ne’ebé sériu. Ospitál ida ne’ebé super-profisionál”.

Ospitál Royal Darwin, Austrália, mak sentru ospitalár ida ne’ebé mak halo atendimentu ba situasaun ‘krítiku saúde’, Prezidente Ramos Horta bainhira akontesimentu atentadu omísidiu iha loron 11 setembru 2008, iha nia rezidénsia Metiaut, Dili.

Nune’e, bainhira vizita ofisiál Estadu, iha nasaun viziñu ne’e, husu kona-ba nia sentimentu pesoál hodi relembra fali situasaun sira ne’ebé, nia hasoru iha tinan 14 liubá, Prezidente repúblika, José Ramos Horta hatán katak momentu ne’ebá la konsege hanoin kona buat ida tanba konsege mentalmente no emosionalmente, ultrapasa problema sira ne’e.

“Ha’u nein hanoin loron ida, ha’u hela iha kuartu ida ne’e, kuartu ida-ne’ebá. Ha’u foka atensaun de’it ba ospitál ne’e, sira-nia ekipamentu, ijiéne, di’ak loos, moos loos, doutór sira kompetente loos, enfermeiru sira trata moras sira di’ak tebes,” nia hateten.

Prezidente repúblika mós rekoñese katak sistema Austrália nian di’ak tebes.

“Sira-nia lei, sira-nia regra rigorozu tebes kona-ba respeitu ba moras sira. Sira-nia doutór, sira-nia enfermeiru, sira-nia formasaun ne’e di’ak tebes. Kuandu ba saúde, ba doutór, tenke entrega aan no ema-ne’ebé iha pasiénsia trata ema moras sira”.

“Klaru, Estadu tau osan-boot ba setór saúde. Tau osan-boot mós tanba impostu, idaidak selu; Austrália ne’e aas tebes 30 itál pursentu. Kompañia selu impostu boot, entaun Estadu iha reseita boot, tau osan fila fali ba setór saúde.

Entretantu, Xefe Estadu, alende vizita Royal Darwin, Austrália, vizita mós Sentru nasionál ba kuidadu krítiku no trauma. Iha vizita ne’e, Xefe Estadu ho delegasaun simu direta husi Diretór, Profesór, Len Notaras.

Iha biban ne’e, vizita no observa mós armazen Sentru nasionál ba kuidadu krítiku no trauma nian.

Jornalista: Rafy Belo

Editór: Evaristo Soares Martins

iklan
iklan

Leave a Reply

iklan
error: Content is protected !!