ANCT-TL sensibiliza estudante Covalima kona-ba impaktu tabaku ba saúde
COVALIMA, 12 setembru 2022 (TATOLI)–Aliansa Nasionál Kontrolu Tabaku Timor-Leste (ANCT-TL) hala’o sensibilizasaun kona-ba impaktu tabaku ba ema-nia saúde no halo prevensaun moras hada’et ba estudante ensinu sekundáriu iha Covalima.
“Ami divulga imformasaun kona-ba impaktu tabaku ba juven sira-nia saúde tanba ami haree asesu ba imformasaun sei menus, ho nune’e liuhosi seminiáriu ida-ne’e hodi hasa’e joven sira-nia kuñesimentu kona-ba impkatu tabaku ba ema-nia saúde,” Diretór ANCT-TL, Sancho Belito Fernandes, hateten ba jornalista sira, iha Salaun Centru Juventude Covalima, segunda ne’e.
Papel autoridade relevante-sira ko’alia kona-ba tabaku no lei kontrolu tabaku, tanba ne’e enkoraja autoridade sira atu halo asaun tuir dekretu-lei hodi bele implementa iha munisípiu ida- idak.
Autoridade sira mós iha kompeténsia atu halo kontrolu no halo inspesaun hodi reforsa implementa lei kontrolu tabaku tantu fuma iha fatin públiku no bandu sigaru ba menoridade sira.
La’ós autoridade sira de’it maibé Polisia Nasional Timor-Leste (PNTL) mós iha papel importante atu halo inspesaun hodi fó autoridade sanitária no mós apoiu inspesaun Jeral Saúde nian.
“Impaktu hosi tabaku ba moras lá hadaet imforma ba públiku kona-ba moras la hada’et ne’ebé sa’e makaas iha ita-nia rain no oho ema makaas bazea ba ne’e autoridade mós iha kompeténsia hodi halo promosaun no públikasaun produtu tabaku no bandu fuma iha fatin públiku,” nia dehan.
Administradór munisípiu Covalima, Francisco de Andrade esplika, dala barak professor sira fó ezemplu ba estudante-sira tanba sira mak autór atu fuma, ho nune’e autoridade husu ba estudante halo komparasaun tuir buat ne’ebé di’ak se ladi’ak labele halo tuir, tanba joven mak futuru ba nasaun.
Tanba, realidade hatudu joven-sira mak fuma barak liu duké kompara ho katuas sira, tanba ne’e ho atividade ohin loron bele fó hanoin ba joven sira mak futuru ba nasaun atu minimiza fuma tabaku.
“Ha’u hanoin joven-sira aprende buat ne’ebé di’ak dala ruma joven sira lakohi fuma maibé situasaun mak obriga. Ha’u haree iha eskola profesór sira la’o sai tama ho sigaru, entaun ita la sai ezemplu. Tanba ne’e, bainhira atu fuma tenke haree fatin ne’ebé mak merese atu fuma,” nia hateten.
Jornalista : Celestina Teles
Editór : Cancio Ximenes
