Forsa EUA no F-FDTL fasilita tratamentu saúde ba komunidade Baucau
BAUCAU, 12 setembru 2022 (TATOLI)-Forsa Estadu Unida Amerika (EUA) hosi komponente aéreu hamutuk ho FALINTIL-Forsa Defeza Timor-Leste (F-FDTL) realiza ezersísiu konjunta pasífiku angel hodi fasilita tratamentu saúde ba komunidade iha Baucau.
Pontu fokál ezersísiu konjunta hosi F-FDTL, Kapitaun Adelino Guilela, esplika atividade refere hanesan parte ezersísiu konjunta entre forsa aéreu EUA nian hanaran pasifiku angel 22-4 ho F-FDTL hodi halo tratamentu saúde gratuita ba komunidade durante loron lima, hahú segunda, 12 setembru to’o loron-sesta, 16 setembru iha Baucau.
“Tinan-nee forsa aéreu EUA ho F-FDTL hili fatin ida-ne’e hodi halo ezersísiu pasífiku angel 22-4 ba tinan-2022 nian hodi halo tratamentu saúde ba ita-nia komunidade munisipiu Baucau, halo mós atividade enjeñaria iha eskola Aubaca, suku Triloka, Nagarjo suku Bahú, Buruma ho Gariuai ho gratuita,” Kapitaun F-FDTL, Gilela hateten iha Sentru Konvensaun Baucau (CCB, sigla portugés) Vila Antiga, segunda ne’e.
Atividade tratamentu saúde refere kompostu hosi médiku F-FDTL hamutuk ho forsa aéreu Amerika hanesan parte kontinuasaun ezersísiu pasífiku angel ne’ebé antes hala’o ona iha munisípiu Dili no Covalima.
Alende halo tratamentu saúde, ezersísiu konjunta sei kontinua halo konstrusaun edifísiu eskola iha area Aubaca, Nagarjo, Buibau no Gariuai.
Komandante forsa pasífiku Angel 22-4 EUA, Inzi Friel, hateten, serbisu hamutuk forsa aéreu ezersísiu konjunta iha iha Baucau sei halo terapia ba matan, nehan no moras seluk ne’ebé sei fasilita hosi médiku espesialista.
Durante tratamentu, Forsa EUA sei fasilita doutór espesialista na’in-neen kompostu hosi doutór matan na’in-rua, dentista (doutór nehan) na’in-rua, médiku jerál na’in-rua, ne’ebé sei ajuda médiku hosi FALINTIL-FDTL inklui pesoál saúde hosi Baucau.
Jornalista : Natalino Belo
Editór : Evaristo Soares Martins
