DILI, 12 setembru 2022 (TATOLI)–Primeiru-Ministru (PM), Taur Matan Ruak, segunda ne’e, asina livru kondolénsia ba falesimetu Liurai-Feto Elizabeth II nia mate iha loron 08 setembru 2022, ho idade 96, iha Castelo Balmoral, Eskósia.
“Lori Governu no povu timor-oan nia naran, hato’o sentidu kondolénsia ba família Liurai-Feto nian, nune’e mós ba Governu no povu Reinu Unidu,” refere nota ne’ebé Agência Tatoli asesu.
Liurai-Feto Elizabeth II (Elizabeth Alexandra Mary), moris iha loron 21 abril 1926, iha Londres no mate hafoin iha fulan balun liubá selebra ninia jubileu ukun ba tinan-70, iha istória británika ne’ebé naruk liu.
Notísia relevante: PR Horta asina karta kondolénisa ba matebian Raiña Elizabeth II
Elizabeth II hanesan Liurai-Feto monarkia konstitusionál hosi nasaun soberanu 16 no xefia Commonwealth, ne’ebé hanesan organizasaun governamentál kompostu hosu país independente 53 no sai hanesan Governadór Supremu Igreja Inglaterra.
Nune’e, Liurai-Feto Elizabeth II nia oan mane boot Charles (Charles Filipe Artur Jorge) mak daudaun ne’e troka nia fatin iha tronu no adota títulu Charles III.
Jornalista : Antónia Gusmão
Editora : Julia Chatarina