iklan

DILI, HEADLINE, POLÍTIKA, SEGURANSA

PN husu grupu arte marsiál kontribui ba estabilidade

PN husu grupu arte marsiál kontribui ba estabilidade

Prezidente Komisaun B, José Agostinho Sequeira ‘Somotxo’. Imajen Tatoli/Nelson de Sousa.

DILI, 12 setembru 2022 (TATOLI)—Parlamentu Nasionál (PN) liuhosi komisaun B trata asuntu Negósiu Estranjeiru, Defeza no Seguransa, husu ba grupu arte marsiál atu kontribui ba estabilidade iha rai-laran.

“Hotu-hotu hola parte, arte marsiál iha Timor-Leste tenke hanoin katak ita sira-ne’e tenke kontribui ba estabilidade,” Prezidente Komisaun B, José Agostinho Sequeira ‘Somotxo’, hateten ba jornalista sira iha Parlamentu Nasionál, segunda ne’e.

Eis Ministru Defeza ne’e hateten, problema tuda malu ne’ebé envolve pesoál sira hosi grupu arte marsiál ne’ebé ema hotu hatene ne’ebé la konsege rezolve.

“La’ós ita atu kondena no Governu halo esforsu hotu hodi legaliza sira maibé konfrontu iha nafatin entaun ita tenke haree polítika loloos ida oinsá bele responde ba arte marsiál no ema hotu-hotu hola parte arte marsiál tenke kontribui ba estabilidade,” nia apela

Tanba, nia parte lakohi aban bainrua Estadu kondena fali sira hanesan grupu ne’ebé organiza krime, ida-ne’e labele tanba sira mós tenke iha responsabilidade perante ba nasaun liu-liu seguransa no pás.

Aleind ene’e, ema ne’ebé atu tama iha arte marsiál presiza hatene ninia vantajen hanesan desportu ida no oinsá eduka ema sai sidadaun di’ak ne’ebé doutrina organizasaun rasik iha.

“Sira mós tenke hatene katak benefísíu individuál, hanesan ha’u treinu tama ida-ne’e benefísiu ba ha’u ne’e saida no hanesan família no Estadu ne’e saida. Sira tenke hatene ida-ne’e, hodi ida-idak tetu mak foin ita bele tama iha grupu sira-ne’e, se lae ita tama buka konfrontu,” nia fó hanoin.

Nune’e, presiza kontribuisaun hodi hanoin no mós presiza estabelese relasaun amizade ba malu tenke iha inklui entre grupu arte marsiál no grupu arte ritual sira-ne’ebé eziste iha Timor-Leste.

Haree situasaun konfrontu ne’ebé akontese liubá mak Governu hasai dekretu-lei ida hodi halo operasaun konjunta hosi parte autoridade seguransa no militár.

Nune’e, Deputadu Somotxo hateten, operasaun sei termina iha tersa (13/09) aban, maibé se haree mak situasaun seidauk kontroladu tuir previstu iha operasaun ne’e, entaun konserteza operasaun konjunta ne’e extende tan.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!