iklan

EKONOMIA, HEADLINE

Prezidente Autoridade RAEOA sei vizita ró Haksolok semana oin

Prezidente Autoridade RAEOA sei vizita ró Haksolok semana oin

Prezidente Autoridade RAEOA, Arsénio Paixão Bano.Imajen Tatoli/Egas Cristóvão

DILI, 12 setembru 2022 (TATOLI)–Prezidente Autoridade Rejiaun Administrativa Espesiál Oé-cusse-Ambeno (RAEOA), Arsénio Paixão Bano, semana oin, sei hala’o vizita traballu ba Portugal hodi haree direta progresu konstrusaun ró Haksolok.

“Ha’u mai hasoru Primeiru-Ministu hodi informa katak, semana oin ha’u sei ba Portugal hodi haree direta progresu ro Haksolok no atu prova informasaun sira ami simu ne’e loos hotu ka lae,” Prezidente Autoridade RAEOA relata progresu serbisu ba Primeiru-Ministru (PM), Taur Matan Ruak, iha Rezidénsia Farol, segunda ne’e.

Nia dehan, hafoin haree direta progresu mai sei hato’o relatóriu ba Xefe Governu.

“Ha’u hakarak ba haree direta ne’e atu konfirma progresu to’o iha ne’ebé. Ha’u fiar katak ró ne’e sei mai tanba parte legál no preparativu sira ami halo hotu ona. Importante maka sasán la’o tuir nia dalan tanba ne’e patrimóniu Timór nian,” nia akresenta.

Notísia relevante : Autoridade RAEOA Sei La Investe Tan ba Ró Haksolok

Biban ne’e, Primeiru-Ministru husu atu harii estaleiru própriu ba ró, nune’e aban-bainrua bele halo manutensaun ba ró sira.

“Entaun aproveita investimentu ne’ebé iha, Portugal bele mós prepara daudaun ema. ha’u ba semana ida iha ne’ebá, ha’u fiar sei lori novidade di’ak mai Timor,” nia garante.

Aleinde ne’e, nia informa mós katak, orsamentu adisionál millaun $14 ne’e gasta ona besik millaun $5.

“Ami gasta tuir regra tanba ha’u hakarak moos,” nia tenik.

Ró Haksolok ho kustu millaun €13,7, inaugura iha loron 26 maiu 2017 iha sidade Figueira da Foz, Portugal no tuir informasaun sei to’o Timor-Leste iha outubru 2017, maibé tanba problema internál hosi empreza Atlantic Eagle Ship Building ho sub-kontratór maka to’o agora ró seidauk mai. Ró ne’e rasik iha kapasidade atu tula ema na’in-377 no karreta hamutuk 15.

Prosesu kontrusaun Ró Haksolok ninia kontratu asina iha tinan 2014 entre Governu no empreza portugués. Konstrusaun ró ne’e konsege paradu maibé bainhira estabelese Zona Espesiál Ekonomia Sosiál Merkadu (ZEESM), prosesu kontrusaun ró-ahi ne’e entrega ba Autoridade mak responsabiliza.

Desizaun atu hili ninia estaleiru (fatin atu harii ró) hahú no foti hosi V Governo Konstitusionál ne’ebé lidera Kay Rala Xanana Gusmão nu’udar Primeiru-Ministru, tuir ninia reprezentasaun hosi Ministru Transporte no Komunikasaun, Pedro Lay da Silva, ne’ebé selebra kontratu ho estaleiro Atlantic Eagle Ship Building Lda. (Atlanticeagle) iha loron 22 setembru 2014.

RAEOA simu prosesu konstrusaun ró liuhosi transferénsia projetu no alokasaun orsamentu hosi Governu Timor-Leste.

Jornalista   : António Gusmão

Editora        : Julia Chatarina

iklan
iklan

Leave a Reply

iklan
error: Content is protected !!