iklan

EKONOMIA, HEADLINE

Ró kruzeiru Le Lapérouse Austrália to’o Timor iha loron 14 setembru

Ró kruzeiru Le Lapérouse Austrália to’o Timor iha loron 14 setembru

Ro kruzeiru Le Lapérouse. Imajen/CNT

DILI, 12 setembru 2022 (TATOLI)—Diretór Jerál Turizmu hosi Ministériu Turizmu Komérsiu no Indústria (MTKI), Jelino Soares, hateten, tuir planu ró kruzeiru Le Lapérouse hosi Austrália sei to’o Timor-Leste iha loron 14 setembru 2022.

Tuir planu ró ne’e sei atraka uluk iha fatin turizmu Uatobo Baucau durante horas tolu ka haat iha tasi-ibun de’it, hotu kontinua viajen mai Dili iha loron 15 setembru hodi atraka iha portu Dili iha tuku 07:00 dadeer.

“Atividade ne’ebé turista sira sei halo durante iha Dili mak vizita fatin istóriku hanesan Centro Nacional Chega (CNC), Arkivu Muzeu Rezisténsia Timorense (AMRT), Asosiasaun Kafé Timor-Leste, no fatin turizmu mak Uatobo no Cristo Rei. Parte lorokaik ró Kruzeiru filafali bá Kupang Indonézia,” Diretór Jerál Turizmu informa ba Agência Tatoli, iha ninia knaar fatin, Farol, segunda ne’e.

Notísia relevante: Ró kruzeiru Le Lapérouse Austrália to’o Timor iha loron 14 setembru

Preparasaun ne’ebé parte MTKI halo durante simu ró kruzeiru ne’e mak iha parte Baucau koordena ho komunidade hodi prepara produtu lokál sira hanesan nuu no seluk tan atu turista sira durante para iha ne’ebá bele sosa produtu.

“Mai iha Dili ita koordena negosiante sira ne’ebé fa’an produtu lokál sira hodi prepara fatin 10 resin iha portu Dili, atu turista sira bainhira tuun bele hola produtu ne’ebé negosiante sira fa’an hanesan tais, arzenatu no seluk tan,” nia akresenta.

Vantajen hosi vizita ró kruzeiru ne’e mak bele fó retornu ba negosiante no Estadu inklui hatene Timor nia istória.

“Ita-nia alvu ne’e sira to’o mai tenke hola produtu sira ne’ebé ita-nia negosiante sira fa’an,” nia tenik.

Turista sira ne’ebé mai hamutuk 125, la inklui ema sira ne’ebé servisu iha ró laran, karik konta hotu bele to’o 130 resin.

MTKI liuhosi Diresaun Jerál Turizmu koopera hamutuk ho imigrasaun, Polísia Nasionál Timor-Leste (PNTL) liuhosi Tranzitu, Marrítima, Diresaun Nasionál Kuarentena, Bio Seguransa munisípiu Dili, Autoridade Portuáriu Timor-Leste (APORTIL) sei toma-konta hamutuk ho setór privadu sira ne’ebé prepara pakote viajen inklui operadór turístika.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!