DILI, 13 setembru 2022 (TATOLI)–Banku Sentrál Timor-Leste (BCTL, sigla portugés) deside hili instituisaun finanseira, Kaebauk Investimentu no Finansa, SA, sai vensedór dahuluk ba Central Bank Award tinan 2022.
“Depois konsidera ho kuidadu ba rekomendasaun sira, ekipa Central Bank Award liuhosi votasaun segredu iha sesaun traballu Konsellu Administrasaun no Konsellu Jestaun, deside nomeadu individuál no institusionál hosi instituisaun finanseira sira ba Central Bank Award tinan 2022 ho kategoria exelente mak nomeadu dahuluk Diretór Ezekutivu Kaibauk Investimentu no Finansa, Ângelo Soares,” Vise-Governadór, Venâncio Alves Maria, fó sai iha ámbitu selebrasaun aniversáriu BCTL ba da-11, ne’ebé hala’o iha salaun Oka Rudal 7984, Surikmas, tersa ne’e.
Enkuantu, nomeadu daruak mak Telemor Filtec Limitada no nomeadu datoluk mak BCTL.
Vise-Governadór afirma, nomeasaun individuu no instituisaun finanseira ne’e bazeia ba méritu rekoñesimentu públiku aas inklui lideransa forte ho vizaun no orientasaun estratéjiku, kompromisu, determinasaun, dedikasaun, konsisténsia no prezerveránsia, hodi rezulta kriasaun inovasaun produtu servisu finanseiru no kanál distribuisaun sira ne’ebé konsidera kontribui ona ba dezenvolvimentu setór finanseiru no inkluzaun finanseira iha Timor-Leste.
“Desizaun ida-ne’e tanba Ângelo Soares nia kompromisu, dedikasaun, persisténsia no prezerveránsia ne’ebé forte bele lidera dezenvolvimentu mikro finansa Tuba Rai Metin iha tempu susar, bainhira doadór sira deside husik hela sira maibé sira tuba nafatin no hili hodi kontinua Tuba Rai Metin sai Kaibauk Investimentu no Finansa ne’ebé hetan ona lisensa hosi BCTL,” nia akresenta.
Notísia relevante: Rádiu Komunidade Maubisse-Mauloko sai vensedór ba prémiu BCTL
Iha inaugurasaun Central Bank Award iha tinan 2017, BCTL anúnsia katak sei iha kategoria rua hanesan ‘outstanding’ nu’udar rekoñesimentu prestiozu liu no sei fó de’it okaziaun méritu espesiál ruma no ‘exelente’ sei fó anualmente.
Nune’e, selebrasaun tinan ida-ne’e konsidera hanesan méritu espesiál hodi selebra aniversáriu BCTL ba da-11 no tinan 22 jornada BCTL, hahú hosi Custumer Payment Order (CPO) iha tinan 2000 ba Bussiness Process Automation (BPA) no banku sentrál to’o agora.
Tanba ne’e, tinan ne’e iha kategoria outstanding no exelente, inklui atu eleva prosesu nomeasaun no selesaun hodi envolve konsellu administrasaun iha prosesu desizaun ba nomeadu no selesaun vensedór sira.
Biban ne’e, Vise-Governadór informa, ekipa Central Bank Award hafoin konsidera ho kuidadu rekomendasaun sira, prosesu konsulta ho Konsellu Imprensa Timor-Leste iha sesaun traballu Konsellu Administrasaun no Konsellu Jestaun, deside konkorda ho rekomendasaun ekipa juri katak laiha mídia ida mak prenxe kritéria nu’udar nomeadu no vensedór ba Central Bank Award tinan 2022 ba kualker kategoria, enkuantu tinan kotuk manan-na’in ba mídia mak Rádiu Mauloko Maubisse.
Biban hanesan, BCTL mós deside hodi hili Abraão de Vasconselhos sai vensedór ho kategoria outstanding.
“Liuhosi votasaun iha sesaun traballu Konsellu Administrasaun no Konsellu Jestaun BCTL deside nomeadu úniku individuál hosi instituisaun finanseira Central Bank Award 2022 ne’ebé automatikanente sei sai vensedór ho kategoria outstanding mak Abraão de Vasconselhos, atuál Governadór BCTL,” Venâncio fó sai.
Desizaun ne’e tanba konsidera Abraão nia kompromisu, dedikasaun, determinasaun, vizaun orientasaun estratéjiku sira ne’ebé prudente, lideransa forte ne’ebé lidera ona dezenvolvimentu transformasaun institusionál Banku Sentrál no sistema finanseiru Timor-Leste tomak ho fundasaun forte liuliu sistema pagamentu ne’ebé daudaun orientasaun ba dijitalizasaun, polítika Banku Sentrál ezije pesoál sira ne’ebé afetadu ba desizaun ruma la hola parte hosi desizaun prosesu desizaun ne’ebé envolve nia-an rasik, tanba ne’e prosesu Central Bank Award tinan ne’e la envolve nia hanesan governadór.
Iha biban hanesan, Vensedór, Ângelo Soares, sente orgullu tanba BCTL bele hili Kaebauk sai manan-na’in.
“Ha’u sente orgullu no ha’u la espera Banku Sentrál liuhosi servisu ne’ebé maka’as bele halo selesaun ba instituisaun finanseira sira hotu no ikusmai Kaebauk bele hetan Central Bank Award ba tinan ida-ne’e, tanba ne’e ha’u hato’o agradesementu boot tebes ba konfiansa,” nia espresa.
Prémiu ba manán-na’in sira mak trofiu, ne’ebé ofisialmente entrega hosi Governadór BCTL no Primeiru-Ministru (PM), Taur Matan Ruak.
Eventu ne’e partisipa hosi membru Governu balun, parseiru dezenvolvimentu, entidade hosi banku komersiál sira, inklui reprezentante mídia.
Jornalista : Antónia Gusmão
Editora : Julia Chatarina
