iklan

EKONOMIA, INTERNASIONÁL, HEADLINE

Empreza Timor Resources sujere Governu autoriza harii fábrika mina iha Timor-Leste

Empreza Timor Resources sujere Governu autoriza harii fábrika mina iha Timor-Leste

Jerente nasionál empreza Timor Resources, Filomeno de Andrade. Imajen Tatoli/Francisco Sony

DILI, 13 setembru 2022 (TATOLI)—Empreza Timor Resources sujere ba Governu hodi autoriza harii fárika mina iha Timor-Leste, nune’e bainhira perfurasaun mina iha posu sira rai-maran iha rezultadu di’ak, maka bele prodús de’it iha rai-laran.

“Ida-ne’e hanesan ami-nia sujestaun de’it, ne’ebé empreza na’in mai mak diskute hamutuk ho Primeiru-Ministru. Tanba Primeiru-Ministru mós hateten katak importante la’ós de’it atividade mina nian maibé hakarak diversifika atu nune’e joven timor-oan sira bele iha futuru di’ak liután iha área sira seluk, la’ós iha área mina no gás nian de’it,” Jerente nasionál empreza Timor Resources, Filomeno de Andrade, hateten hafoin hasoru malu ho Primeiru-Ministru (PM), Taur Matan Ruak, iha Rezidénsia Farol, tersa ne’e.

Notísia relevante: Timor Resources provizóriu hapara perfurasaun posu Liurai iha Covalima

Daudaun empreza mina ne’ebé boot liu iha Austrália mak NEPEAN Engineering & Innovation.

“Ha’u fó hanoin de’it katak posibilidade ida, ezemplu kadoras ita atu halo nusa maka tenki ba halo fabrikasaun iha li’ur nusa la harii fábrika iha Timór. Karik empreza bele fó mós perspetiva ida, kuandu ita hala’o esplorasaun mina iha rai-maran, enkuantu hein refinaria atu harii ka la harii prosesu sei naruk, empreza bele hakat ba oin bele halo mina refinaria, mina ne’ebé hasai hosi fatin hirak ne’e bele halo kedas refinaria atubele konsume,” nia tenik.

Maski nune’e, nia dehan, kestaun ne’e depende fali hosi Governu, importante maka empreza bele hato’o nia disponibilidade ka bele apoia iha área hirak ne’e.

“Atu harii estudu sei kle’an, ne’e la’ós buat ida ita kalan toba mehi dadeersan hadeer mai bele iha ona,” nia akresenta.

Aleinde ne’e, objetivu vizita no hasoru Primeiru-Ministru, hodi informa tempu badak na’in ba empreza Timor Resources, Suellen Osborne, sei vizita Timor-Leste hodi hametin liután relasaun entre Governu no empreza australiana ne’e. 

“Vizita hosi na’in ba empreza ne’e atu ko’alia planu empreza Timor Resources nian ba oin no perspetiva saida de’it mak Governu Timor-Leste presiza fó apoiu. Ne’e fó hanoin de’it ba Primeiru-Ministru karik iha preokupasaun ruma, aban bainrua atu dada kadoras no atidade sira seluk karik na’in ba empreza Timor Resources, Suellen Osborne ne’e iha potensialidade maka’as,” nia dehan.

Timor Resources hatudu ona katak iha tempu liubá kotuk empreza ne’e nunka fila kotuk ba Timor-Leste maski iha kalamidade COVID-19, enkuantu investidór sira seluk fila ba sira-nia rain maibé empreza ne’e kontinua nafatin ninia servisu.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!